Qaraǵandyda qylmystyq ister jónindegi arnaiy sot birge turatyn áieldi óltirdi dep aiyptalǵan er adamǵa úkim shyǵardy. Ol asa qatygezdikpen adam óltirgeni úshin 18 jylǵa bas bostandyǵynan aiyryldy, dep habarlaidy Dalanews.kz
Politico saitynanyń málimetinshe, qandy oqiǵa Sortirovka shaǵyn aýdanynda bolǵan. Erli-zaiypty resmi nekede turmaǵan, azamattyq nekede birge ómir súrgen.
25 maýsymda áiel qyzynyń toiyna beti kógerip kelgen. Týystarynyń aitýynsha, ony birge turatyn er adam janjal kezinde soqqyǵa jyqqan. Sol kúni áiel úiine oralǵannan keiin birneshe saǵattan soń politsiia onyń jan tapsyrǵanyn habarlaǵan. Denesinde kóptegen jaraqat bolǵan.
Tergeý derekterine sáikes, áiel túngi ekiler shamasynda úige kelgen. Úsh saǵattan keiin quqyq qorǵaý organdary onyń eresek qyzdaryna qaiǵyly habar jetkizgen. Osylaisha qyzy úshin ómirindegi qýanyshqa toly kún anasynyń qazasymen ushtasqan.
Sot materialdaryna qaraǵanda, qylmystan keiin er adam bolǵan jaitty jasyrýǵa tyrysqan. Ol áieldiń úige kelgen soń oǵan ózi shabýyldaǵanyn, al óziniń qorǵanýǵa májbúr bolǵanyn aitqan. Alaida sot usynylǵan dálelderdiń bul nusqany joqqa shyǵarǵanyn atap ótti.
Politsiia oqiǵa ornyna jetkende áiel áli tiri bolǵan. Dereý jedel járdem shaqyrylǵanymen, dárigerler ony qutqara almady, áiel jedel járdem kóliginde jan tásilim etken.
Sottalǵan er adam úkimge apelliatsiialyq shaǵym túsirip, qaitadan ózin qorǵaýǵa májbúr bolǵanyn alǵa tartty. Al marqumnyń qyzy, kerisinshe, onyń jazasyn aýyrlatýdy suraidy. Onyń aitýynsha, anasy jyldar boiy zorlyq-zombylyqqa ushyrap kelgen.
«Ol qalai ózin-ózi qorǵadym dei alady? Anam boiy da alasa, álsiz bolatyn. Tisi túgel edi. Olar qaitadan qosylǵannan keiin, iaǵni ol túrmeden shyqqan soń, anamnyń tisi túgel synǵan boldy. Denesi jaraǵa toly edi», – deidi marqumnyń qyzy.
Apelliatsiialyq sot sheshimi keiin habarlanady.
