قاراعاندىدا قىلمىستىق ىستەر جونىندەگى ارنايى سوت بىرگە تۇراتىن ايەلدى ءولتىردى دەپ ايىپتالعان ەر ادامعا ۇكىم شىعاردى. ول اسا قاتىگەزدىكپەن ادام ولتىرگەنى ءۇشىن 18 جىلعا باس بوستاندىعىنان ايىرىلدى، دەپ حابارلايدى Dalanews.kz
Politico سايتىنانىڭ مالىمەتىنشە، قاندى وقيعا سورتيروۆكا شاعىن اۋدانىندا بولعان. ەرلى-زايىپتى رەسمي نەكەدە تۇرماعان، ازاماتتىق نەكەدە بىرگە ءومىر سۇرگەن.
25 ماۋسىمدا ايەل قىزىنىڭ تويىنا بەتى كوگەرىپ كەلگەن. تۋىستارىنىڭ ايتۋىنشا، ونى بىرگە تۇراتىن ەر ادام جانجال كەزىندە سوققىعا جىققان. سول كۇنى ايەل ۇيىنە ورالعاننان كەيىن بىرنەشە ساعاتتان سوڭ پوليسيا ونىڭ جان تاپسىرعانىن حابارلاعان. دەنەسىندە كوپتەگەن جاراقات بولعان.
تەرگەۋ دەرەكتەرىنە سايكەس، ايەل تۇنگى ەكىلەر شاماسىندا ۇيگە كەلگەن. ءۇش ساعاتتان كەيىن قۇقىق قورعاۋ ورگاندارى ونىڭ ەرەسەك قىزدارىنا قايعىلى حابار جەتكىزگەن. وسىلايشا قىزى ءۇشىن ومىرىندەگى قۋانىشقا تولى كۇن اناسىنىڭ قازاسىمەن ۇشتاسقان.
سوت ماتەريالدارىنا قاراعاندا، قىلمىستان كەيىن ەر ادام بولعان جايتتى جاسىرۋعا تىرىسقان. ول ايەلدىڭ ۇيگە كەلگەن سوڭ وعان ءوزى شابۋىلداعانىن، ال ءوزىنىڭ قورعانۋعا ءماجبۇر بولعانىن ايتقان. الايدا سوت ۇسىنىلعان دالەلدەردىڭ بۇل نۇسقانى جوققا شىعارعانىن اتاپ ءوتتى.
پوليسيا وقيعا ورنىنا جەتكەندە ايەل ءالى ءتىرى بولعان. دەرەۋ جەدەل جاردەم شاقىرىلعانىمەن، دارىگەرلەر ونى قۇتقارا المادى، ايەل جەدەل جاردەم كولىگىندە جان ءتاسىلىم ەتكەن.
سوتتالعان ەر ادام ۇكىمگە اپەللياسيالىق شاعىم ءتۇسىرىپ، قايتادان ءوزىن قورعاۋعا ءماجبۇر بولعانىن العا تارتتى. ال مارقۇمنىڭ قىزى، كەرىسىنشە، ونىڭ جازاسىن اۋىرلاتۋدى سۇرايدى. ونىڭ ايتۋىنشا، اناسى جىلدار بويى زورلىق-زومبىلىققا ۇشىراپ كەلگەن.
«ول قالاي ءوزىن-وزى قورعادىم دەي الادى؟ انام بويى دا الاسا، ءالسىز بولاتىن. ءتىسى تۇگەل ەدى. ولار قايتادان قوسىلعاننان كەيىن، ياعني ول تۇرمەدەن شىققان سوڭ، انامنىڭ ءتىسى تۇگەل سىنعان بولدى. دەنەسى جاراعا تولى ەدى»، – دەيدى مارقۇمنىڭ قىزى.
اپەللياسيالىق سوت شەشىمى كەيىن حابارلانادى.
