Azerbaijan Airlines (AZAL) kompaniiasynyń 25 jeltoqsanda Aqtaýǵa jaqyn mańda apatqa ushyraǵan ushaǵyna qatysty tergeý qorytyndysy osy jyldyń sońyna qarai nemese kelesi jyldyń basynda jariialanýy múmkin, dep habarlaidy Dalanews.kz.
Tergeý eki bólikke bólingen. Qylmystyq is boiynsha tekserýdi Bas prokýratýra júrgizip jatyr. Al áýe apatynyń tehnikalyq sebepterin anyqtaýmen Kólik ministrligi ainalysady.
Premer-ministrdiń orynbasary Qanat Bozymbaevtyń aitýynsha, ministrlik óz qaraýyndaǵy jumysty aiaqtaýǵa jaqyn.
«Kólik ministrligi tergeýdiń sońǵy kezeńinde. Qazirgi kezde biz tehnologiia ielerinen, aeronavigatsiialyq qurylǵylar men basqa da jabdyqtar boiynsha saraptamalyq qorytyndynyń túsýin kútip otyrmyz. Osy qujattar kelgennen keiin ministrlik óz bóligin aiaqtaidy. Esep biyl nemese kelesi jyldyń basynda daiyn bolýy múmkin.
Al Bas prokýratýra júrgizip jatqan bólik boiynsha da ilgerileý bar. Kórshi memleketter basshylarynyń túrli málimdemelerin ózderińiz de kórdińizder. Sol sebepti, kelesi jyly ol baǵyttaǵy tergeý de aiaqtalady dep úmittenemiz», – dedi Bozymbaev Májilis kýlýarynda jýrnalisterdiń saýalyna jaýap berip.
Eske salaiyq, 2024 jylǵy 25 jeltoqsanda Aqtaý áýejaiy mańynda AZAL áýe kompaniiasynyń jolaýshylar ushaǵy apatqa ushyrap, saldarynan 38 adam qaza taýyp, 29 jolaýshy jaraqat alǵan bolatyn.
