Qazaq boksshysy, burynǵy WBO chempiony Jánibek Álimhanulynyń 7 jeltoqsanda AQSh-ta ótýi tiis Erislandi Laramen (WBA) jekpe-jegi bolmaityn boldy. Oǵan sebep – VADA doping-testiniń oń nátijesi. Bul jaǵdaiǵa qatysty boksshy komandasy resmi málimdeme jasady, dep habarlaidy Dalanews.kz
Boksshy komandasynyń aitýynsha, jaǵdai kútpegen jerden bolǵan.
«Bul jańalyq bizdi qalai tańǵaldyrsa, jankúierlerdi de dál sondai kúige túsirgenin bilemiz. VADA-nyń alǵashqy synamasy taza dep habarlandy. Alaida keiin ekinshi synamadan kúmán týdyrǵan kórsetkish tabylǵany aityldy. Birinshi jáne ekinshi test arasynda biz ne tamaqtanýymyzdy, ne vitamin qabyldaý tártibin ózgertken joqpyz. Munyń sebebin túsine almai otyrmyz», – delingen málimdemede.
Komanda jekpe-jekke tórt ai boiy daiyndalǵanyn, shetelde qomaqty shyǵyn jumsap, otbasynan jyraq júrgenin atap ótti.
Sondai-aq komanda menedjerleri men zańgerleri isti tolyq zerttep jatqanyn, qaita synama tapsyrýǵa ruqsat suralǵanyn habarlady. Buryn alynǵan synamanyń ekinshi bóligi de qaita tekserilip jatyr.
Boksshynyń ózi de bul jaǵdaiǵa tańǵalǵanyn jazady.
«Men árqashan taza sportty jaqtaimyn. Muny bárińiz bilesizder. VADA birinshi ret analiz alǵan kezde bári taza degen edi. Ekinshi testte nege mundai kórsetkish shyqqanyn túsinbei otyrmyn. Qaita analiz tapsyrýǵa ótinish berdik. Jaýabyn kútip otyrmyz», – dedi Jánibek áleýmettik jelidegi paraqshasynda.
WBO bul oqiǵa boiynsha ishki tergeý bastaǵanyn resmi túrde rastady.
Ázirge jańa tekseristiń nátijesi qashan shyǵatyny belgisiz. Komanda jaǵdaidy «sporttaǵy qiyn synaqtardyń biri» dep baǵalap, jankúierlerden qoldaý bildirýdi surady.
