قازاق بوكسشىسى, بۇرىنعى WBO چەمپيونى جەنٸبەك ەلٸمحانۇلىنىڭ 7 جەلتوقساندا اقش-تا ٶتۋٸ تيٸس ەريسلاندي لارامەن (WBA) جەكپە-جەگٸ بولمايتىن بولدى. وعان سەبەپ – VADA دوپينگ-تەستٸنٸڭ وڭ نەتيجەسٸ. بۇل جاعدايعا قاتىستى بوكسشى كومانداسى رەسمي مەلٸمدەمە جاسادى, دەپ حابارلايدى Dalanews.kz
بوكسشى كومانداسىنىڭ ايتۋىنشا, جاعداي كٷتپەگەن جەردەن بولعان.
«بۇل جاڭالىق بٸزدٸ قالاي تاڭعالدىرسا, جانكٷيەرلەردٸ دە دەل سونداي كٷيگە تٷسٸرگەنٸن بٸلەمٸز. VADA-نىڭ العاشقى سىناماسى تازا دەپ حابارلاندى. الايدا كەيٸن ەكٸنشٸ سىنامادان كٷمەن تۋدىرعان كٶرسەتكٸش تابىلعانى ايتىلدى. بٸرٸنشٸ جەنە ەكٸنشٸ تەست اراسىندا بٸز نە تاماقتانۋىمىزدى, نە ۆيتامين قابىلداۋ تەرتٸبٸن ٶزگەرتكەن جوقپىز. مۇنىڭ سەبەبٸن تٷسٸنە الماي وتىرمىز», – دەلٸنگەن مەلٸمدەمەدە.
كوماندا جەكپە-جەككە تٶرت اي بويى دايىندالعانىن, شەتەلدە قوماقتى شىعىن جۇمساپ, وتباسىنان جىراق جٷرگەنٸن اتاپ ٶتتٸ.
سونداي-اق كوماندا مەنەدجەرلەرٸ مەن زاڭگەرلەرٸ ٸستٸ تولىق زەرتتەپ جاتقانىن, قايتا سىناما تاپسىرۋعا رۇقسات سۇرالعانىن حابارلادى. بۇرىن الىنعان سىنامانىڭ ەكٸنشٸ بٶلٸگٸ دە قايتا تەكسەرٸلٸپ جاتىر.
بوكسشىنىڭ ٶزٸ دە بۇل جاعدايعا تاڭعالعانىن جازادى.
«مەن ەرقاشان تازا سپورتتى جاقتايمىن. مۇنى بەرٸڭٸز بٸلەسٸزدەر. VADA بٸرٸنشٸ رەت اناليز العان كەزدە بەرٸ تازا دەگەن ەدٸ. ەكٸنشٸ تەستتە نەگە مۇنداي كٶرسەتكٸش شىققانىن تٷسٸنبەي وتىرمىن. قايتا اناليز تاپسىرۋعا ٶتٸنٸش بەردٸك. جاۋابىن كٷتٸپ وتىرمىز», – دەدٸ جەنٸبەك ەلەۋمەتتٸك جەلٸدەگٸ پاراقشاسىندا.
WBO بۇل وقيعا بويىنشا ٸشكٸ تەرگەۋ باستاعانىن رەسمي تٷردە راستادى.
ەزٸرگە جاڭا تەكسەرٸستٸڭ نەتيجەسٸ قاشان شىعاتىنى بەلگٸسٸز. كوماندا جاعدايدى «سپورتتاعى قيىن سىناقتاردىڭ بٸرٸ» دەپ باعالاپ, جانكٷيەرلەردەن قولداۋ بٸلدٸرۋدٸ سۇرادى.
