Atyraýda tórt adamnyń ólimine qatysty sot protsesi jalǵasyp jatyr. Kezekti otyrysta aiyptalýshy Sultan Sársemáliev otbasy ishindegi burynǵy jaǵdailardy baiandady, dep habarlaidy dalanews.kz.
Sársemálievtiń aitýynsha, bir kúni túngi saǵat 12-de oǵan dáriger habarlasyp, áieliniń shuǵyl operatsiiaǵa kiretinin aitqan. Dáriger odan aýrýhanaǵa kelip, qolhat berý qajet ekenin jetkizgen.
"Dáriger: "Áieliń operatsiiaǵa kiredi. Sen kereksiń, qolhat kerek. Áielińniń aiaǵy aýyr. Balańa da, áielińe de kepildik bermeimiz, ota bolady" dedi", – dedi ol sotta.
Aiyptalýshynyń sózinshe, ol aýrýhanaǵa barmaq bolǵanda, áieliniń ákesi men qaiyn aǵasy qarsy shyqqan. Olar onyń balalarmen úide qalýyn talap etken.
"Men baram degende ákesi de, qaiyn aǵam da qarsy shyqty. "Balany baǵyp úide bolasyń. Eger sen ketseń, balalardy óz anańa aparyp tastaisyń" degen qorqynyshtary boldy", – dedi Sársemáliev.
Onyń aitýynsha, sol sátte ol qaiyn jurtynan qatty kóńili qalǵan. Aiyptalýshy bul sózderin marqumdardy qaralaý nemese ózin aqtaý úshin emes, jaǵdaidy túsindirý úshin aityp otyrǵanyn jetkizdi.
Sársemáliev sol kezde arada qatty janjal bolǵanyn, tipti tóbeleske deiin barǵanyn aitty. Onyń sózinshe, bul jaǵdaiǵa qatysty dáleli de bar.
"Men tergeý kezinde aqtalýǵa tyrysqan joqpyn. 2024 jyldyń 30 tamyzynda Muqanǵaliev Naýryz WhatsApp-ta Ádemi apasymen sóileskende sol jaǵdai týraly aitqan. "Sultandy uryp tastaýǵa shaq qaldyq. Balasy bolǵan soń tiisken joqpyz, aiadyq" degen sózder aitylǵan", – dedi ol.
Aiyptalýshy bul málimetti sotqa usynbaǵanyn aitty. Onyń sózinshe, sol kezde ol bolǵan jaǵdaidy túsindire almai, basqa jol kórmegen.
"Áielim operatsiiada jalǵyz boldy. Qasyna eshkim kirmegen", – dedi Sársemáliev sotta.
Qazirgi ýaqytta sot otyrysy jalǵasyp jatyr. Istiń tolyq mán-jaiy sot barysynda anyqtalmaq.
