Atyraýda tórt adamdy óltirdi dep aiyptalǵan Sultan Sársemálievke qatysty sot protsesi jalǵasyp jatyr. 16 maýsymdaǵy otyrysta aiyptalýshydan jaýap alyndy, dep habarlaidy dalanews.kz.
Sot barysynda Sársemáliev oqiǵaǵa deiingi jaǵdaidy óz nusqasy boiynsha aityp berdi. Onyń sózinshe, balalaryna anasy qarap otyrǵan. Al 2025 jyldyń qyrkúieginde áieli Aqbaian Muqanǵalievaǵa birinshi top múgedektigi bar degen anyqtama berilgen. Keiin ony áreketke qabiletsiz dep taný týraly sheshimdi eki ai kútý qajet bolǵan.
Aiyptalýshy osy ýaqytta úsh jasar qyzy men áielin alyp, qaiyn jurty turatyn Jangeldin aýylyna barýdy oilaǵanyn aitty. Onyń aitýynsha, ol Aqbaiannyń týystarymen sóilesip, jaǵdaidy túsindirmek bolǵan.
«Kózqarasy ózgergen bolar, baryp qaitaiyq dedim. Jaqsy bolsa, Aqbaianǵa qamqorshy retinde sol kisilerdi taǵaiyndaidy dep oiladym. Bardym. Eshteńe oilastyryp barǵan joqpyn. Janymda úsh jasar qyzym bar. Oiyn bilgim keldi», — dedi Sársemáliev sotta.
Onyń sózinshe, bul jaǵdai 3 qarasha kúni bolǵan. Aiyptalýshy qaiyn jurtynyń úiine kirgen kezde ózin jyly qarsy almaǵanyn aitty.
«Úidegi Maqsot Qarabalin, Násip Óteshqalieva, Meiramgúl Qarabalina “sen nege keldiń?” dedi. Esikten kirgen boida qatty sózder aitty. Aqbaian demalsynshy dep, “erteń sóileseiik” dedim de, uiyqtap qaldym», — dedi ol.
Sársemálievtiń aitýynsha, kelesi kúni tańerteń ony áieliniń ákesi oiatyp, qalǵan balalardy alyp kelýdi talap etken.
«Tańǵy ýaqytta ákesi aiaǵymnan teýip oiatty. “Qalǵan balalar qaida? Olardy alyp kel. Aqbaian osy úide qalady” dedi. Anadai kózqarasty túsinbei qaldym. Beker keldim degen oi boldy», — dedi aiyptalýshy.
Ol qamqorshylyq pen múgedektikke qatysty máseleni túsindirip úlgermegenin jetkizdi. Sársemálievtiń sózinshe, qaiyn jurty qalǵan balalardy da ákelýdi talap etip, ákelmegen jaǵdaida úiine baryp janjal shyǵaratynyn aitqan.
Aiyptalýshy sotta bul jaǵdai ózine psihologiialyq turǵydan aýyr áser etkenin málimdedi. Sonymen qatar ol elge kelgen soń qylmysyn moiyndaǵanyn aitty.
«Elde tergeýshige jetpei, áýejaida qabyldaǵan kisilerge qylmysymdy moiyndap tastaǵam. Aqtalatyndai, qylmystan jaltaratyndai eshqandai áreket jasaǵan joqpyn», — dedi Sársemáliev.
Sotta aiyptalýshy kózine jas alyp, bolǵan jaǵdaiǵa qatysty ókinishin jetkizdi.
«Túsinemin, artyq kettim. Biraq olar da ózderi surap alǵandai boldy. Bireýi bolmasa bireýi qoiar dep múmkindik berdim ǵoi», — dedi ol.
Qazirgi ýaqytta sot protsesi jalǵasyp jatyr. Istiń tolyq mán-jaiy sot barysynda anyqtalmaq.
