Astanadaǵy sý tasqyny problemasyn sheshý úshin shamamen 200-250 mlrd teńge qajet. Bul qarajatqa 2025-2030 jyldary 412 shaqyrymdyq nóser káriz júiesin, 7 tazartý qurylǵysyn, 35 sorǵy stantsiiasyn salý jáne 2 tazartý qurylǵysyn qaita jańartý josparlanǵan, dep habarlaidy Dalanews.kz.
Bul týraly QR Indýstriia jáne qurylys ministrligi KazTAG redaktsiiasynyń suranysyna jaýap retinde málimdedi.
Ministrlik ókilderiniń aitýynsha, jańa Sý kodeksinde nóser, erigen jáne tasqyn sýlardy jinaý úshin sý sharýashylyǵy qurylystaryn paidalaný qarastyrylǵan. Bul sý aýyl sharýashylyǵy qajettilikterine baǵyttalatyn bolady.
Jańadan engizilgen ózgeristerge sáikes, eldi mekenderdi nóser jáne erigen sýlardyń basý máselesin sheshý úshin jańa Sý kodeksinde “Eldi mekenderdiń nóser (drenaj) káriz júieleri”atty arnaiy bap engizilgen. Bul bapta júiege kelip túsetin sý kólemin esepteý, sondai-aq nóser, erigen, infiltratsiialyq, sýarý jáne drenajdy sýlardy burý men tazartý qyzmetteriniń qunyn esepteý normalary qamtylǵan.
Budan bólek, jańa Sý kodeksi aiasynda nóser káriz júielerin salý, jańartý jáne paidalaný boiynsha qurylys normalary men erejelerine ózgerister men tolyqtyrýlar engizý kózdelgen.
Qazirgi tańda Astananyń nóser káriz júiesi 18 tazartý qurylǵysynan, bir jinaqtaý toǵanynan jáne 611 shaqyrymdyq magistraldi kollektorlardan turady. Bul júie 16,7 myń gektardan astam aýmaqtyń ústińgi sýlarynyń aǵýyn qamtamasyz etedi. Degenmen qalada sý basý qaýpi joǵary problemalyq aimaqtar áli de bar.
