Ishki týristik jáne logistikalyq marshrýttardy damytý – Qazaqstan Prezidenti Qasym-Jomart Toqaev «Ádiletti Qazaqstan: zań men tártip, ekonomikalyq ósý, qoǵamdyq optimizm» atty Joldaýynda atap ótken basym baǵyttardyń biri. Osyǵan bailanysty Memleket basshysy Shyǵys Qazaqstan oblysynyń Zaisan jáne Katonqaraǵai aýdandarynda áýejailar salýdy tapsyrdy. Bul týristik tartymdylyǵy joǵary óńirlerde áýejailar salý – olardyń áleýetin damytý men investitsiialyq tartymdylyǵyn arttyrýǵa jasalǵan úlken qadam. Qurylystyń barysymen Shyǵys Qazaqstanǵa jumys sapary barysynda QR Kólik ministri Marat Qarabaev tanysty, dep habarlaidy Dalanews.kz.
Qazirgi ýaqytta jobalyq-smetalyq qujattama daiyndalyp, bilikti merdiger uiymdar tartyldy. Qurylys-montaj jumystary 2025 jyldyń mamyr aiynda bastalyp, jeltoqsan aiynda aiaqtalady dep josparlanýda. Joba «Qazaeronavigatsiia» RMK qarajaty esebinen qarjylandyrylyp, jol jáne injenerlik infraqurylymmen qamtamasyz etiledi. Atap ótý kerek, qurylys jumystary kezeńinde-aq jańa áýejailar jumys oryndaryn ashý, jergilikti óndiris materialdaryn paidalaný, qazaqstandyq quramdy ulǵaitý siiaqty ekonomikalyq áser beredi. Óńirde ushý-qoný jolaqtary men áýe ailaǵy infraqurylymynyń basqa da elementterin salý jáne qaita jańartý boiynsha tájiribesi mol kompaniialar bar.
Óńir basshysy Nurymbet Saqtaǵanovtyń aitýynsha, eki áýejaidyń salynýy týrizm men ekonomikanyń basqa salalarynyń damýyna úlken múmkindikter ashady. Jańa áýe ailaǵy kóliktik-logistikalyq habqa ainalyp, birden birneshe aýdandy oblys ortalyǵymen bailanystyrady. Bul júk jáne jolaýshylar tasymalynyń turaqtylyǵyn qamtamasyz etip, taýar ainalymyn arttyrady, jergilikti biznesti damytyp, ekonomikanyń ósýi men halyqtyń ómir sapasynyń jaqsarýyna yqpal etedi.
- Jańa jumys oryndary ashylyp, áýejai týrister aǵynyn arttyrady. Bul tek elimizden ǵana emes, shetelden de týristerdi tartýǵa múmkindik beredi. Osylaisha, jańa týristik brendterdi damytýǵa jol ashylady. Zaisan aýdany – Qazaqstannyń qaqpasy, al Katonqaraǵai aýdany – pantoemdeý jáne dástúrli qazaq meditsinasy damyǵan óńir. Munda qonaq úiler, atpen serýendeý, dástúrli aýyl taǵamdary usynylatyn agrotýrizm qarqyn alýda. Budan bólek, munda taý shańǵysy kýrortyn da qurýǵa bolady, óitkeni áýejai jabyq joldar siiaqty qolaisyzdyqtardy joiady, al zamanaýi jabdyq kez kelgen derlik aýa raiy jaǵdaiynda reisterdi qabyldaýǵa múmkindik beredi, – dedi Nurymbet Saqtaǵanov.
Katonqaraǵai aýdanynda áýejai Belqaraǵai men Órnek aýyldarynyń arasynda, «Óskemen – Rahman qainary» avtojoly mańynda salynady. Katonqaraǵai aýylynan 25 km, Úlken Naryn aýylynan 62 km qashyqtyqta ornalasady. Al Zaisan aýdanynda áýejai burynǵy Satpai áskeri aerodromynyń ornynda, «Omby – Maiqapshaǵai» tas jolyna jaqyn jerde salynady. Ol Zaisan qalasynan 25 km, Aqjar aýylynan 85 km qashyqtyqta ornalasady.
- Kelesi týristik maýsymǵa deiin Zaisan jáne Katonqaraǵai aýdandaryndaǵy áýejailar alǵashqy reisterdi qabyldaýǵa daiyn bolýy tiis, – dedi QR Kólik ministri Marat Qarabaev.
Qurylystyń bastapqy kezeńinde áýejailarda uzyndyǵy 2200 metr, eni 45 metr ushý-qoný jolaqtary salynady. Bul Q400, ATR 42/72, CRJ200 ushaqtaryn qabyldaýǵa múmkindik beredi. Osylaisha, Shyǵys Qazaqstanda Katonqaraǵai, Zaisan, Tarbaǵatai aýdandary men Úlken Naryn aimaǵy áýe qatynasymen qamtylady. Astana, Almaty, Óskemen jáne Semeige ishki reister, sondai-aq Qytai men Reseige halyqaralyq baǵyttar ashý josparlanýda. Bul tek Katonqaraǵai ǵana emes, jaqyn mańdaǵy aýdandarǵa da ekonomikalyq áserin tigizedi.
- Saratovka kolledjinde kelesi oqý jylynan bastap aviatsiia salasy boiynsha mamandardy daiarlaý bastalady. Olar tájiribeden Shyǵys Qazaqstandaǵy tikushaq otriady bazasynda ótedi. Bizdiń mindetimiz – jańa áýejailardy joǵary bilikti kadrlarmen qamtamasyz etý, – dep atap ótti óńir basshysy Nurymbet Saqtaǵanov.
