S. Amanjolov atyndaǵy ShQÝ mamandary ShQO Politsiia departamenti, oblystyq prokýratýra jáne ShQO ishki saiasat basqarmasymen birlesip, stýdentter men oqytýshylarǵa arnalǵan tsifrlyq qaýipsizdik boiynsha innovatsiialyq oqytý kýrsyn ázirledi, dep habarlaidy Dalanews.kz
Birlesken jumys halyqtyń quqyqtyq saýattylyǵyn arttyrýǵa jáne kiberqaýipsizdik máseleleri jóninde aqparattandyrýǵa baǵyttalǵan.
– Elimizde jyl saiyn 20 myńnan astam internet-alaiaqtyq faktisi tirkeledi. 2024 jyly zardap shekken qazaqstandyqtarǵa 1 mlrd 400 mln teńge qaitaryldy. Ózekti máseleniń aldyn alý jáne kúresý maqsatynda osy kýrsty ázirledik, – dedi ShQO PD kiberqylmysqa qarsy is-qimyl basqarmasynyń bastyǵy Darhan Kamalhanov.
Bir ai kóleminde aptasyna bir ret ótetin sabaqty ShQO PD kiberqylmysqa qarsy kúres bóliminiń aǵa jedel ýákili politsiia aǵa leitenanty Nurai Arystanbek ótkizedi. Kýrsta dárister, treningter men tájiribelik saǵattar ótedi. Oqýdy sátti aiaqtaǵan bilim alýshylarǵa arnaiy sertifikattar tabystalyp,tsifrlyq qaýipsizdik boiynsha erikti jattyqtyrýshy mártebesi beriledi. Aita keteiik, kýrsqa kez kelgen mamandyqtaǵy stýdentter qatysa alady.
– Mundai kýrs tehnologiialardyń qarqyndy damýyna bailanysty týyndaǵan zamanýi syn-qaterler kezinde tiimdi áreket etýge múmkindik beredi. Jastardyń bul bastamaǵa belsendi qatysýy úlken mańyzǵa ie. Bizdiń stýdentter kýrsty bitirgen soń óńirdegi, qaladaǵy qarttarǵa kómektesetin tsifrly eriktilerdiń qataryna qosyla alady, - dedi ShQÝ-dyń strategiialyq damý jáne halyqaralyq qatynastar jónindegi prorektory Irina Rovniakova.
Alǵashqy sabaq ashyq dáris formatynda ótti. Spiker Nurai Arystanbek internettegi qaýip-qater túrleri týraly baiandady. Onyń aitýynsha, qylmyskerler únemi jańa ádisterdi qoldanyp, ońai berile qoimaidy. Eń kóp taralǵan alaiaqtyq qatarynda fishing nemese áleýmettik injeneriia, jasandy intellekt kómegimen shabýyldar, spýfing jáne ziiandy baǵdarlamalar bar.
Sarapshy internet paidalanýshylary úshin negizgi usynystardy da atap ótti. Olar – operatsiialyq júieni turaqty túrde jańartý, senimdi antivirýs baǵdarlamasyn ornatý jáne kúrdeli qupiiasózder kombinatsiiasyn qoldaný.
