«Astana – esirtkisiz qala» aksıasy aıasynda Saryarqa aýdanynda jeńil atletıkalyq júgiris ótti,- dep habarlaıdy Dalanews.kz

Osy jolǵy basty ereksheligi – qatysýshylar jańa marshrýt boıynsha baqtaryn synady.

4 shaqyrymdyq qashyqtyqqa jalǵasqan júgiris Arbattaǵy Kenesary han eskertkishiniń aldynan bastalyp, Yryskeldi qajy meshitiniń janynda máresine jetti.

«Astana – esirtkisiz qala» uranymen kezekti júgirisimizdi uıymdastyrdyq. Bul joly júgirý baǵyty jańartyldy. Kezekti ret qatysýshylarymyz Esil ózeniniń boıymen jańa baǵytta júgirdi. Qatysýshylar áserlerimen bólisip, razy bolyp jatyr. Sondaı-aq júgirisimiz jıi uıymdastyrylsa da medaldarymyz únemi jańartylyp turady. Bunyń ózi qosymsha emosıa beretindigi sózsiz. Júgiristiń arqasynda qala turǵyndary demalystyń tańyn sportpen bastaýdy ádetke aınaldyryp keledi. Qazirdiń ózinde otbasymen birge tolyqtaı qatysatyndardyń sany artyp jatqany anyq baıqalady. Elordamyzda júgirý men velosherýden ózge buqaralyq sporttyń da túrin ótkizýge atsalysyp jatyrmyz», – dedi Astana qalasy ákimdiginiń Sporttyq-buqaralyq is-sharalardy ótkizý dıreksıasy basshysynyń orynbasary Erjigit Óserbaı.

Jarysqa 1000-ǵa jýyq áýesqoı júgirýshi qatysyp, 9:00-de 4 shaqyrymdyq qashyqtyqty bastap ketti.

«10 jyldan astam ýaqyt boıy júgirip kelemin. Búginde júgirý ádet bolyp ketti. Salaýatty ómir saltyn ózim arqyly nasıhattaǵannyń arqasynda ózge tanystarym da osy joldy tańdady», – dedi jarysqa qatysýshy Jansultan Qaldarov.

Buqaralyq júgiristiń sońynda ádettegideı qatysýshylardyń arasynda velosıped oınatylyp, estelik medal berildi.