Qazaqstan Prezidenti Qasym-Jomart Toqaev Konstitýtsiianyń 30 jyldyǵyna arnalǵan konferentsiiada sot júiesinde júrgizilgen reformalardyń nátijesine toqtaldy,- dep habarlaidy Dalanews.kz
Memleket basshysynyń aitýynsha, Konstitýtsiialyq sot qurylǵannan beri eki jarym jyl ishinde onyń qaraýyna 11 myńnan astam ótinish túsken.
– Bul halyqtyń jańadan engizilgen konstitýtsiialyq baqylaý institýtyna senimi joǵary ekenin kórsetedi. Konstitýtsiiaǵa qaishy kóptegen normalar quqyqtyq júieden alynyp tastaldy. Budan bylai Konstitýtsiialyq sottyń sheshimi ádil zańnamanyń negizine ainalady, – dedi Toqaev.
Prezident sonymen qatar Ákimshilik rásimdik-protsestik kodekstiń engizilýi azamattardyń memleketpen aradaǵy daýlarynda ádiletti sheshimder shyǵýyna yqpal etkenin atap ótti. Onyń dereginshe, qazirgi tańda mundai isterdiń 60 paiyzy azamattar men kásipkerlerdiń paidasyna sheshilip jatyr.
Sondai-aq Memleket basshysy sot úkimderiniń ádildigi artqanyn, sýdialardy irikteý men taǵaiyndaý rásimderi ashyq ótkenin, sot isin júrgizý tsifrlandyrylǵanyn aitty.
Toqaev biyl 1 shildeden bastap «jappai kassatsiia» qaǵidaty engizilgenin erekshe atap ótip, bul qadam sot júiesin jańǵyrtýdyń mańyzdy bóligi ekenin jetkizdi.
Sonymen birge, Konstitýtsiialyq reforma aiasynda prokýratýranyń qadaǵalaý ókilettigi keńeiip, Adam quqyqtary jónindegi ýákilge konstitýtsiialyq mártebe berildi. Endi Ombýdsmen de Bas prokýror siiaqty Konstitýtsiialyq sotqa júginý quqyǵyna ie boldy.
