Elimizdiń Konstitýtsiiasy kúni qarsańynda Jetisý oblysynda azamattarǵa tegin zańgerlik keńes berildi. Sol siiaqty 16 jasqa tolǵan azamatattarǵa jeke kýálikteri saltanatty túrde tabys etildi,- dep habarlaidy Dalanews.kz
Taldyqorǵandaǵy Jetisý oblysynyń Kásipkerler palatasynyń ǵimaratynda oblystyq qoǵamdyq damý jáne ádilet departamenti birlesip halyqtyń quqyqtyq saýatyn arttyrý maqsatynda tegin zańgerlik kómek kórsetý sharasyn uiymdastyrdy. Munda kez kelgen azamattyń elimizdiń zań qoǵamdastyǵy ókilderinen tegin konsýltatsiia alýyna múmkindik jasaldy. Bul sharaǵa advokattar, notariýstar, prokýrorlar, tergeýshiler, sot oryndaýshylary, memlekettik jáne quqyq qorǵaý organdardyń basshylary jáne basqa da jaýapty organdar qyzmetkerleri, jalpy sany 40 maman jumyldyryldy. Mamandardyń aitýynsha, turǵyndardyń basym bóligi turǵyn úi, jer, áleýmettik kómek t.b. máseleler boiynsha zań kómegine júgingen.
– Osy sharaǵa aldyn ala habarlandyrý berip, kópshilikti qulaǵdar ettik. Sonyń nátijesinde búgin 100-ge jýyq adam kelip, konsýltatsiia aldy. Jalpy oblystyq ádilet departamenti jyl basynan beri osyndai 12 shara uiymdastyryp, 7 myńǵa jýyq adamǵa tegin zańgerlik keńes berdi. Mundai bastamalar turǵyndardyń quqyqtyq saýatyn arttyrýǵa, olardyń máseleleriniń zań aiasynda sheshilýine oń yqpalyn tigizedi, – deidi oblystyq ádilet departamentiniń basshysy Erjan Erkenov.
Kelýshiler mundai igi sharalar jii uiymdastyrylyp tursa degen tilek aitty.
– Quqyqtyq turǵyda keńes alý úshin advokatqa júginýge, memlekettik organdar ókilderine jolyǵyp, máseleniń mánisin surap bilýge múmkindigimiz bola bermeidi. Osyndai zańgerlik keńes alańyn jii uiymdastyryp tursa, qarapaiym halyqqa óte tiimdi bolar edi. Ózim tiisti mamandarǵa júginip, qajetti keńes aldym, – deidi qala turǵyny Bektemis Bekturǵanov.
Taǵy bir turǵyn mamandarǵa óziniń saýaldaryn qoiyp, máseleniń mánisin bilip qaitqanyn aitady.
– Men II toptaǵy múgedekpin. Zeinetke shyǵýǵa jasym kelip qaldy. Soǵan orai naqty qandai qujattar qajet, qujattardy qashan, qaida aparamyn degen siiaqty odan basqa da saýaldarymnyń jaýabyn bilip qaityp baramyn, – deidi taldyqorǵandyq Ulbolsyn Nursapaeva.
Taǵy bir merekelik shara, osy kúni #ATAZAN_AZAMAT_KZ respýblikalyq chellendji aiasynda Taldyqorǵan qalasyndaǵy Halyqqa qyzmet kórsetý ortalyǵynda 15 jasóspirimge jeke kýálik tabystaldy. Bul shara jai ǵana qujat berý rásimi emes, jastardyń qoǵam aldyndaǵy mindetin sezindiretin erekshe sát boldy.
Ózge de turǵylastarymen birge qolyna qujat alǵandardyń biri taldyqorǵandyq Eren Tursynaqyn:
– Men búgin Konsitýtsiia kúni qarsańynda erekshe aitýly sáttiń kýási boldym. Qurdastarymmen birge jeke kýálikti saltanatty jaǵdaida alyp, ózimdi elimniń tolyqqandy múshesi retinde maqtanyshty sezimdi bastan keship turmyn. Bizge Konstitýtsiia kitaby men Abaidyń qara sózderi jinaǵyn syiǵa tartty. Bul sonymen qatar azamattyq úlken jaýapkershilik ekenin de bilemin. Zańdy qurmetteýge, ózimdi jeke tulǵa retinde damytýǵa, jaqsy maman bolýǵa bar kúsh-jigerimdi jumsaimyn, – deidi ol.
Jyl basynan beri Jetisý oblysynda 7214 jasóspirimge jeke kýálik tabystaldy, onyń ishinde atalǵan chellendj aiasynda 40 jasqa resmi túrde tapsyryldy.
