Еліміздің Конституциясы күні қарсаңында Жетісу облысында азаматтарға тегін заңгерлік кеңес берілді. Сол сияқты 16 жасқа толған азамататтарға жеке куәліктері салтанатты түрде табыс етілді,- деп хабарлайды Dalanews.kz

 Талдықорғандағы Жетісу облысының Кәсіпкерлер палатасының ғимаратында облыстық қоғамдық даму және әділет департаменті бірлесіп халықтың құқықтық сауатын арттыру мақсатында тегін заңгерлік көмек көрсету шарасын ұйымдастырды. Мұнда кез келген азаматтың еліміздің заң қоғамдастығы өкілдерінен тегін консультация алуына мүмкіндік жасалды. Бұл шараға адвокаттар, нотариустар, прокурорлар, тергеушілер, сот орындаушылары, мемлекеттік және құқық қорғау органдардың басшылары және басқа да жауапты органдар қызметкерлері, жалпы саны 40 маман жұмылдырылды. Мамандардың айтуынша, тұрғындардың басым бөлігі тұрғын үй, жер, әлеуметтік көмек т.б. мәселелер бойынша заң көмегіне жүгінген.

– Осы шараға алдын ала хабарландыру беріп, көпшілікті құлағдар еттік. Соның нәтижесінде бүгін 100-ге жуық адам келіп, консультация алды. Жалпы облыстық әділет департаменті жыл басынан бері осындай 12 шара ұйымдастырып, 7 мыңға жуық адамға тегін заңгерлік кеңес берді. Мұндай бастамалар тұрғындардың құқықтық сауатын арттыруға, олардың мәселелерінің заң аясында шешілуіне оң ықпалын тигізеді, – дейді облыстық әділет департаментінің басшысы Ержан Еркенов.

Келушілер мұндай игі шаралар жиі ұйымдастырылып тұрса деген тілек айтты.

– Құқықтық тұрғыда кеңес алу үшін адвокатқа жүгінуге, мемлекеттік органдар өкілдеріне жолығып, мәселенің мәнісін сұрап білуге мүмкіндігіміз бола бермейді. Осындай заңгерлік кеңес алаңын жиі ұйымдастырып тұрса, қарапайым халыққа өте тиімді болар еді. Өзім тиісті мамандарға жүгініп, қажетті кеңес алдым, – дейді қала тұрғыны Бектеміс Бектұрғанов.

Тағы бір тұрғын мамандарға өзінің сауалдарын қойып, мәселенің мәнісін біліп қайтқанын айтады.

 – Мен II топтағы мүгедекпін. Зейнетке шығуға жасым келіп қалды. Соған орай нақты қандай құжаттар қажет, құжаттарды қашан, қайда апарамын деген сияқты одан басқа да сауалдарымның жауабын біліп қайтып барамын, – дейді талдықорғандық Ұлболсын Нұрсапаева. 

Тағы бір мерекелік шара, осы күні #ATAZAN_AZAMAT_KZ республикалық челленджі аясында Талдықорған қаласындағы Халыққа қызмет көрсету орталығында 15 жасөспірімге жеке куәлік табысталды. Бұл шара жай ғана құжат беру рәсімі емес, жастардың қоғам алдындағы міндетін сезіндіретін ерекше сәт болды.

Өзге де тұрғыластарымен бірге қолына құжат алғандардың бірі талдықорғандық Ерен Тұрсынақын:

– Мен бүгін Конситуция күні қарсаңында ерекше айтулы сәттің куәсі болдым. Құрдастарыммен бірге жеке куәлікті салтанатты жағдайда алып, өзімді елімнің толыққанды мүшесі ретінде мақтанышты сезімді бастан кешіп тұрмын. Бізге Конституция кітабы мен Абайдың қара сөздері жинағын сыйға тартты. Бұл сонымен қатар азаматтық үлкен жауапкершілік екенін де білемін. Заңды құрметтеуге, өзімді жеке тұлға ретінде дамытуға, жақсы маман болуға бар күш-жігерімді жұмсаймын, – дейді ол.

Жыл басынан бері Жетісу облысында 7214 жасөспірімге жеке куәлік табысталды, оның ішінде аталған челлендж аясында 40 жасқа ресми түрде тапсырылды.