Aqtóbe qalasynda úsh iri nysannyń — drama teatry, stadion jáne kópfýnktsionaldy sport kesheniniń qurylysy bastaldy. Bul jobalar Memleket basshysynyń tapsyrmasy aiasynda júzege asyrylýda, dep habarlaidy Dalanews.kz
Atalǵan nysandar oblys ortalyǵyndaǵy «Altyn orda» áleýmettik-iskerlik ortalyǵynyń quramyna enedi. Jalpy aýmaǵy 165,8 gektardy quraityn jańa keshen qalanyń sáýlettik kelbetin túrlendirip, aqtóbelikter men qala qonaqtary úshin zamanaýi mádeni, sporttyq jáne demalys aimaǵyna ainalmaq.
Oblys ákimi Ashat Shaharov pen qala ákimi Azamat Beket qurylys alańynda bolyp, jobanyń barysymen tanysty. Azamat Bekettiń aitýynsha, ortalyqta 700 oryndyq oblystyq drama teatry, 34 980 kórermenge arnalǵan fýtbol stadiony jáne 5 000 oryndyq kópfýnktsionaldy sport kesheni salynady. Sondai-aq munda qonaqúiler, saýda jáne oiyn-saýyq ortalyqtary, bilim berý mekemeleri jáne Qazaqstan kartasynyń pishinin beineleitin erekshe «Altyn orda» saiabaǵy boi kótermek.
Barlyq nysandar ózara úilesimdi bir keshen retinde biriktiriledi. Ortalyq ainalasynda demalys pen serýendeýge arnalǵan keń abattandyrylǵan aimaqtar jasalyp, turǵyndarǵa qolaily orta qalyptastyrylady.
Joba týristik klaster retinde de qarastyrylǵan. 59 gektar aýmaqta demalys saiabaǵy ornalasady, al bizneske arnalǵan jer telimderi arnaiy komissiia sheshimimen bólinbek. Bul óz kezeginde aýmaqtyń investitsiialyq tartymdylyǵyn arttyrady.
Oblys ákimi Ashat Shaharovtyń aitýynsha, qurylys alańynyń ornalasýy tiimdi tańdalǵan.
«Jer telimi qalanyń dál ortasynda, infraqurylymy daiyn «Altyn orda» shaǵyn aýdanynda ornalasqan. Bul logistika jaǵynan da, shyǵyn turǵysynan da tiimdi. Aldaǵy jyldary Aqtóbede zamanaýi sport arenasy paida bolyp, bolashaq chempiondar osy jerde jattyǵatyn bolady», — dedi óńir basshysy.
Qurylys basqarmasynyń basshysy Erjan Muzdybaev qazirgi tańda barlyq jumystar bekitilgen kestege sai júrip jatqanyn habarlady. Drama teatrynyń irgetasy qalanyp, sport kesheninde alań daiyndaý jumystary júrip jatyr. Al bolashaq stadionnyń aýmaǵy tolyq qorshalyp, qurylysqa daiyndyq kezeńi júrgizilýde.
Aqtóbede boi kóteretin jańa «Altyn orda» áleýmettik-iskerlik ortalyǵy — óńirdiń mádeni jáne sporttyq ómiriniń jańa kezeńin bastaityn strategiialyq joba bolmaq.
