Almatyda AQSh konsýldyǵyn salý úshin 70 myń sharshy metr jer telimi bólingeni belgili. Ony jalǵa alý merzimi 49 jyldy quraidy. Amerikalyqtar bul jer telimi úshin qansha aqy tóleitini belgili boldy, dep habarlaidy Dalanews.kz Ulysmedia.kz saityna silteme jasap.
Bul kelisimge byltyr 27 qyrkúiekte Niý-Iorkte Qazaqstan men AQSh úkimetteri arasynda qol qoiylǵan. Ol boiynsha Almatyda AQSh konsýldyq mekemesiniń úi-jailaryn salý úshin sol eldiń úkimetine jer ýchaskesin jalǵa berý týraly kelisim ratifikatsiialanýy kerek.
"AQSh tarapy jaldaý kezeńi úshin 25 301 016 AQSh dollaryn tóleidi. Kelisim engizilgen kúnnen bastap kúntizbelik 30 (otyz) kún ishinde biryńǵai tólem jasalady", delingen resmi qujatta.
Al bul tólem jyl saiynǵy ma, álde jalpy jalǵa alǵan merzim boiynsha bekitilgen be? Bul saýalǵa arnaiy baspasóz máslihatynda QR syrtqy ister ministriniń birinshi orynbasary Aqan Rahmetýllin jaýap berdi:
"AQSh tarapy jaldaý kezeńi úshin, sondai-aq odan keiingi uzartý kezeńderine jer ýchaskesi úshin jaldaý aqysy túrinde 25 301 016 AQSh dollaryn tóleidi. Ol jyl saiynǵa belgilenbegen, kelisimsharttaǵy merzim boiynsha bekitilgen, iaǵni ol merzim aiaqtalyp, kelisim taǵy uzartylyp jatsa, bul tólem qaitalanady".
Bul arada AQSh úkimeti jer ýchaskesi men konsýldyq ǵimaratyna qatysty qandai da bir salyqtar men ózge de tólemderdi tóleýden bosatylatynyn aita ketelik, iaǵni jalǵa alý aqysyn esepke almaǵanda. Sonymen qatar, Kelisimniń 6-babynda AQSh Úkimeti konsýldyq ǵimaratynyń qurylysyna bailanysty jumsalǵan barlyq shyǵystardy, sondai-aq bailanys, elektr, gaz, sý jáne jylýmen jabdyqtaý qyzmetterin, basqa da kommýnaldyq qyzmetterdi Qazaqstandaǵy qoldanystaǵy normativter men tarifterge sáikes tólem jasai otyryp, ǵimaratty kútip-baptap ustaýǵa jáne jóndeýge jumsalǵan shyǵystardy derbes tóleýge mindet alady.
Sondai-aq ǵimaratty salý jáne jabdyqtaý úshin AQSh-ta óndirilgen materialdardy,jabdyqtardy jáne taýarlardy paidalana alatyn AQSh merdigeri bas merdiger retinde áreket etedi.
Konsýldyq ǵimaratty jabdyqtaý jáne jihazben jabdyqtaý úshin AQSh Úkimeti importtaityn barlyq materialdar, kerek-jaraqtar men taýarlar kedendik tólemderden, import salyqtarynan jáne ruqsat alý talaptarynan da bosatylady.
