Táýelsizdik merekesiniń qarsańynda Tekeli qalasynyń ákimi Batyr Qaiyrkenuly Moldahmetov Batyr ana Sábdikenova Jámila Bainaýryzqyzynyń shańyraǵyna arnaiy baryp, ájeidi týǵan kúnimen quttyqtady. «Ana aldynda bárimiz de bas iemiz, ana aldynda bárimiz de boryshtarmyz. Ultyńyz ben urpaǵyńyzdyń besigin terbetken jaqsy ǵumyryńyz jalǵasa bersin», – dep izgi tilegin aitqan óńir basshysy týǵan kún iesine syilyǵyn tabys etip, otbasy múshelerin de kelip jetken aitýly merekemen quttyqtady.
«Adam – urpaǵymen baqytty» desek, 93-ke kelgen Jámila Sábdikenova anamyz, aitsa aitqandai, urpaǵymen baqytty jan. Eki ǵasyrdyń kýási bolǵan qart ana qazaqtyń da osy kezeń aralyǵyndaǵy tarihi jylnamasynan oryn alǵan san qily oqiǵalardy janarynyń taspasynan ótkerip, júregine qattap keledi.
[caption id="attachment_58827" align="aligncenter" width="650"]
Anasy – Nurqaisha óz zamanyndaǵy bedeldi, aýqatty adamnyń qyzy edi. XIX ǵasyrdyń bas kezindegi alasapyran – «qyzyldar qyrǵyny» kezinde bir áýletten jalǵyz ózi tiri qalyp, artynan Bainaýryz atamen shańyraq kóteredi. Ákesi Bainaýryz ben sheshesi Nurqaishanyń jalǵyz qyzy bolǵan Jámila áje 1950-jyldary institýtty jańa bitirip, Maisk aýylyna muǵalim bolyp kelgen Tursyn atamen tanysyp, otaý quryp 40 jyl tatý-tátti ǵumyr keshedi.
[caption id="attachment_58822" align="aligncenter" width="650"]
Tórt ul, bes qyz ósirip, olardan qazir 29 nemere, 36 shóbere súiip otyr.
Jubaiy Sábdikenov Tursyn (1929-1990) – Eńbekshi aýylynyń mektebinde 40 jyl ustazdyq etken, Alakól aýdany, burynǵy Taldyqorǵan oblystyq, aýdandyq sovettiń birneshe márte depýtaty bolyp, Qazaq SSR-ine eńbegi sińgen úzdik muǵalim, eńbek ardageri atanǵan elge qadirli tulǵa.
[caption id="attachment_58818" align="aligncenter" width="650"]
Osyndai irgeli áýlettiń berekesin kirgizip otyrǵan Batyr ana jas kúninen ata-eneniń kóńilin taýyp, balalarynyń da tárbiesin eleýsiz qaldyrmai, ár iske belsene aralasyp, úidiń de, túzdiń de sharýasyna úlgerip júrdi. Halyqtyń basyna túsken nebir qiyn kezeńder alystaǵan saiyn kóńilden óshpese de kómeskilene bastaǵan sol jyldardyń óteýindei, búginde beibit zamannyń baqytty ájesi atanyp otyr.
[caption id="attachment_58820" align="aligncenter" width="651"]
Ata-ananyń eń úlken mindetteriniń biri – imandy, baýyrmal, deni saý, bilimdi, eńbekqor, kishipeiil, jany izgi, kóregendi urpaq tárbieleý. Ulyn uiaǵa, qyzyn qiiaǵa qondyrǵan abzal ana nemereleri men shóbereleriniń de zamanǵa sai laiyqtalǵan tárbiemen ósip kele jatqanyna dáiim rizalyǵyn bildirip otyrady.
Otbasylyq merekelerde ul-qyzdary men nemere-shóbereleri bir qaýym el bolyp jinalǵanda júregi meiirimge toly aq áje, qýanyshtan bir jasap qalady. Búginde japyraǵy jaiqalǵan alyp báiterektei bolyp otyrǵan Batyr ana týǵan-týys, quda-jegjat, aýyl-aimaǵynyń ortasynda da syi-qurmetke bólenip, izgilikke toly ǵumyrymen úlgi bolyp keledi.
[caption id="attachment_58817" align="aligncenter" width="650"]
Qarty bar eldiń qazynasy bar. Iá, ár sózi men ár isi danalyqqa tunyp turǵan qariialarǵa kórsetiler qurmet qashanda júrekke jylylyq uialatary sózsiz. Eńsesi biik egemendi eldiń táýelsizdigi baiandy bolýyn tilegen Jámila ájei de týǵan kúnimen arnaiy quttyqtap kelgen aimaq basshysyna alǵysyn bildirip, aq batasyn berdi.
Batyr Qaiyrkenulynyń Tekeli qalasynyń ákimi qyzmetin taiaýda ǵana bastaǵanyna qaramastan, óńirde halyq igiligi úshin jasalyp jatqan sharalardyń kóptigine de Batyr ana razylyǵyn bildirdi. Rýdnichnyi aýyldyq okrýginde balalar fýtbol alańynyń ashylýy sportsúier jasóspirimderdi qýanyshqa keneltse, Abai atyndaǵy amfiteatrdyń qurylys jumystarynyń sátti aiaqtalýy rýhaniiattyń óristeýine sep bolary anyq.
Tekeliniń tumsa tabiǵaty otandyq týrizmdi damytýǵa tunyp tur desek artyq aitqandyq bolmas. Qala ákimi osy baǵyttaǵy igi isterdi qolǵa alyp, taýly óńirdiń órisin keńitip, halqyn baqýattandyrýdy aldaǵy tyń josparlarǵa qosqan.
Tekeli qalasynyń tynysyn keńeitip, kórkin asyrar ózge de jumystardyń qolǵa alynyp, jalǵasyn taýyp jatqany el damýyna kirpish bolyp qalanary anyq.
Medina BAQYT
