Otandyq sırk óneri úlken jeńiske jetti. Almaty sırkiniń artıseri – Batyr Januzaq pen Marlen Maratov Mılanda ótken bedeldi «Lo Show Dei Record» halyqaralyq shoýynda rekord ornatyp, Gınnestiń rekordtar kitabyna endi. Bul týraly Almaty qalasynyń óńirlik komýnıkasıalar qyzmetiniń baspasóz konferensıasynda rekordsmenderdiń ózderi málimdedi,- dep habarlaıdy Dalanews.kz
Italıada olar «Basyna qolymen tik súıenip turǵan adammen birge satymen jyldam ýaqytta kóterilip-túsý» nomınasıasy boıynsha biregeı rekord ornatty. Artıser eń áserli ári qaýipti trúkty nebári 36,66 sekýnd ishinde tamasha oryndap shyqty. Bul jetistik kórermenderdi ǵana emes, halyqaralyq qazylar alqasyn da tańǵaldyrdy. Olar almatylyq akrobattardyń erekshe daıarlyǵynyń, eptiligi men sheberligin atap ótti.
«Bul keremet sát boldy. Biz bul rekordqa uzaq ýaqyt tabandylyq tanyta otyryp daıyndaldyq. Bútin zaldyń qoshemetin kórý – umytylmaıtyn erekshe sát boldy», — dedi, rekord ornatqan Batyr Januzaq.
Artıser buǵan deıin álemdik sahnada da óner kórsetip, «America's Got Talent», «Britain's Got Talent» jáne «China’s Got Talent» sıaqty belgili shoýlarǵa qatysyp, fınalǵa shyǵyp, júldeger atanǵan.
«Biz úshin bul jaı ǵana rekord emes, bul sırk ónerine mahabbatyn, ómirin arnaǵan búkil komandamyzdyń eńbegine berilgen baǵa. Bizge sengen barlyq jankúıerge alǵysymyz sheksiz», — dep tolyqtyrdy Almaty sırkiniń artısi, rekordsmen Marlen Maratov.
Qazaq memlekettik sırkiniń basshysy Maqsat Jaıyqovtyń aıtýynsha, bul rekord qazaqstandyq ártisterdiń deńgeıi joǵary ekenin dáleldep, Almaty sırkiniń halyqaralyq arenadaǵy bedelin nyǵaıtýǵa jasalǵan taǵy bir qadam boldy.
«Biz ónerpazdarymyzben maqtanamyz. Bul rekord – jeke jetistik qana emes, sonymen qatar qazaq sırk óneriniń damýyna qosylǵan zor úles. Endi Qazaqstanda naǵyz sırk sheberleri bar ekenin búkil álem biledi», — dedi Qazaq memlekettik sırkiniń dırektory Maqsat Jaıyqov.
