Shymkent qalasynda sybailas jemqorlyq qaýpi joǵary salalarda 33 zańbuzýshylyq faktisi anyqtaldy. Bul týraly Sybailas jemqorlyqqa qarsy qyzmet habarlady. Solardyń biri — sport basqarmasynyń 1995 jyly salynǵan eski ǵimaratty 3,6 milliard teńgege satyp alý áreketi, dep habarlaidy Dalanews.kz.
Otyrar.kz taratqan málimetke sáikes, atalǵan nysan tehnikalyq jaǵynan eskirgen ári quny shynaiy naryq baǵasynan áldeqaida joǵary bolǵan. Antikorrýptsiialyq qyzmettiń aralasýynan keiin bul mámile toqtatylyp, bólingen qarajat biýdjetke qaitaryldy.
Bul jaǵdaiǵa qatysty pikir bildirgen Sybailas jemqorlyqqa qarsy is-qimyl departamentiniń Shymkent qalasy boiynsha basqarma basshysy Jandos Bekasanov bylai dedi:
«Qandai ǵimaratty, qai ýaqytta jáne qandai jaǵdaida satyp alýǵa bolatyny jóninde naqty tártiptiń bolmaýy — laýazymdy tulǵalarǵa óz betinshe sheshim qabyldaýǵa jol ashyp otyr. Alaida biz usynym bergennen keiin, kelisimshart kúshin joiylyp, aqsha keri qaitaryldy».
Daýly jaǵdailardyń biri — №119 mektepke arnalǵan biologiia kabinetin jabdyqtaýǵa bólingen qarjyǵa qatysty boldy. Bastapqyda bul maqsatqa 685 million teńge qarastyrylǵan. Alaida tekserý nátijesinde bul soma 100 esege qysqartylyp, 6,8 million teńgege deiin tómendetildi.
Jandos Bekasanovtyń aitýynsha, mundai shekten tys soma mamannyń tehnikalyq qatesinen ketken. Biraq ol jaýapkershilikti tek mamanǵa júkteýge bolmaitynyn aityp ótti:
«Mundai shyndyqqa janaspaityn jospardy bekitken laýazymdy tulǵalar jaýapqa tartyldy», – dedi ol.
