شىمكەنت قالاسىندا سىبايلاس جەمقورلىق ءقاۋپى جوعارى سالالاردا 33 زاڭبۇزۋشىلىق فاكتىسى انىقتالدى. بۇل تۋرالى سىبايلاس جەمقورلىققا قارسى قىزمەت حابارلادى. سولاردىڭ ءبىرى — سپورت باسقارماسىنىڭ 1995 جىلى سالىنعان ەسكى عيماراتتى 3،6 ميلليارد تەڭگەگە ساتىپ الۋ ارەكەتى، دەپ حابارلايدى Dalanews.kz.

Otyrar.kz تاراتقان مالىمەتكە سايكەس، اتالعان نىسان تەحنيكالىق جاعىنان ەسكىرگەن ءارى قۇنى شىنايى نارىق باعاسىنان الدەقايدا جوعارى بولعان. انتيكوررۋپسيالىق قىزمەتتىڭ ارالاسۋىنان كەيىن بۇل مامىلە توقتاتىلىپ، بولىنگەن قاراجات بيۋدجەتكە قايتارىلدى.

بۇل جاعدايعا قاتىستى پىكىر بىلدىرگەن سىبايلاس جەمقورلىققا قارسى ءىس-قيمىل دەپارتامەنتىنىڭ شىمكەنت قالاسى بويىنشا باسقارما باسشىسى جاندوس بەكاسانوۆ بىلاي دەدى:

«قانداي عيماراتتى، قاي ۋاقىتتا جانە قانداي جاعدايدا ساتىپ الۋعا بولاتىنى جونىندە ناقتى ءتارتىپتىڭ بولماۋى — لاۋازىمدى تۇلعالارعا ءوز بەتىنشە شەشىم قابىلداۋعا جول اشىپ وتىر. الايدا ءبىز ۇسىنىم بەرگەننەن كەيىن، كەلىسىمشارت كۇشىن جويىلىپ، اقشا كەرى قايتارىلدى».

داۋلى جاعدايلاردىڭ ءبىرى — №119 مەكتەپكە ارنالعان بيولوگيا كابينەتىن جابدىقتاۋعا بولىنگەن قارجىعا قاتىستى بولدى. باستاپقىدا بۇل ماقساتقا 685 ميلليون تەڭگە قاراستىرىلعان. الايدا تەكسەرۋ ناتيجەسىندە بۇل سوما 100 ەسەگە قىسقارتىلىپ، 6،8 ميلليون تەڭگەگە دەيىن تومەندەتىلدى.

جاندوس بەكاسانوۆتىڭ ايتۋىنشا، مۇنداي شەكتەن تىس سوما ماماننىڭ تەحنيكالىق قاتەسىنەن كەتكەن. ءبىراق ول جاۋاپكەرشىلىكتى تەك مامانعا جۇكتەۋگە بولمايتىنىن ايتىپ ءوتتى:

«مۇنداي شىندىققا جاناسپايتىن جوسپاردى بەكىتكەن لاۋازىمدى تۇلعالار جاۋاپقا تارتىلدى»، – دەدى ول.