Almaty oblysynda jolaýshylar avtobýsy men poıyzdyń qatysýymen iri jol-kólik oqıǵasy boldy. Apat Almaty - Boraldaı - Shamalǵan stansıasy baǵytyndaǵy temirjol ótkelinde tirkelgen, dep habarlaıdy Dalanews.kz.
Óńirlik polısıa departamentiniń málimetinshe, marshrýttyq avtobýstyń júrgizýshisi kómir stansıasynan kele jatqan poıyzǵa jol bermeı, soqtyǵysqa jol bergen. Qazir oqıǵanyń barlyq mán-jaıyn anyqtaý úshin tekseris júrgizilip jatyr.
Jol apaty saldarynan alty adam zardap shekti.
Oblystyq densaýlyq saqtaý basqarmasynyń málimetinshe, zardap shekkenderdiń barlyǵy jedel járdem brıgadalary arqyly İle aýdandyq ortalyq aýrýhanasyna jáne Boraldaı kentiniń aýdandyq aýrýhanasyna jetkizildi.
Dárigerlik tekserýden ótip, qajetti medısınalyq kómek kórsetilgennen keıin naýqastar ambýlatorıalyq em qabyldaýǵa jiberildi.
Atalǵan jaǵdaı Almaty oblystyq densaýlyq saqtaý basqarmasynyń baqylaýynda.
