Memleket basshysy Qazaqstan Respýblıkasy Qaýipsizdik Keńesiniń otyrysyn ótkizdi, dep habarlaıdy Dalanews.kz.
Prezıdent Qasym-Jomart Toqaevtyń tóraǵalyǵymen Qazaqstan Respýblıkasynyń 2021-2025 jyldarǵa arnalǵan ulttyq qaýipsizdik strategıasyn júzege asyrý qorytyndysy shyǵaryldy.
Úkimet negizgi kórsetkishterge qol jetkizý týraly esep berdi. Sondaı-aq birqatar salalyq memlekettik organ jetekshileri basty baǵyttar boıynsha baıandama jasady.
Memleket basshysy geosaıası ahýaldy eskere otyryp, qoǵamdyq, ekonomıkalyq, ekologıalyq, sý jáne azyq-túlik qaýipsizdigi máselelerin pysyqtaý qajettigine nazar aýdardy.
Budan bólek, otyrysta Qazaqstan Respýblıkasynyń 2026-2030 jyldarǵa arnalǵan ulttyq qaýipsizdik strategıasynyń jobasy qaraldy. Memlekettik josparlaý júıesiniń mańyzdy quramdas bóligi sanalatyn bul Strategıa aldaǵy bes jylda bolýy yqtımal syn-qaterlerge tótep berýdiń negizgi tásilderin anyqtaıdy.
Jıynda Premer-mınıstrdiń orynbasary – Ulttyq ekonomıka mınıstri Serik Jumanǵarın orta merzimge arnalǵan basymdyqtar, maqsatty ındıkatorlar men strategıalyq táýekelderdi basqarý mehanızmderi jóninde baıandady.
Qasym-Jomart Toqaevtyń aıtýynsha, jańa Konstıtýsıany qabyldaý arqyly memleket damýyndaǵy jańa kezeńge qadam basyp, Qazaqstannyń Táýelsizdigin, egemendigi men aýmaqtyq tutastyǵyn senimdi túrde qorǵaýǵa múmkindik týdy. Al atalǵan Strategıa konstıtýsıalyq qaǵıdattardyń múltiksiz saqtalýyn qamtamasyz etip, elimizdiń turaqty ári qarqyndy damýyna jaǵdaı jasaıdy.
Memleket basshysy ulttyq múddeni qorǵaý mindetterin sapaly oryndaýdyń mańyzyna basa mán berdi. Onyń qataryna, atap aıtqanda, qorǵanys qabiletin qamtamasyz etý; azamattardy, qorshaǵan ortany jáne aqparattyq keńistikti qorǵaý deńgeıin arttyrý; kıberqaýipsizdik sharalaryn kúsheıtý jáne áleýmettik-ekonomıkalyq saladaǵy táýekelderdi azaıtý máseleleri kiredi.
Sonymen qatar Qasym-Jomart Toqaev ekonomıka, bilim men tehnologıa salalarynda suranysqa ıe bilikti sheteldik mamandardy tartýǵa qolaıly jaǵdaı jasaıtyn baǵdarlamany jedeldetip ázirleýdi tapsyrdy.
