Almatyda 16 qańtar kúni tańǵy saǵat 07:00-de jaýa bastaǵan qar 18 qańtar kúni saǵat 04:00-ge deıin tolastamaı, osy aralyqta shahar aýmaǵyna 18 santımetr qar tústi. 23 qańtar kúni túngi saǵat 01:30-dan bastap qalada qar qaıta jaýa bastady. Ol 23:00-ge deıin jalǵasady dep boljanyp otyr. Keshki saǵat 20:00-degi málimetke sáıkes Almatyda 8 santımetr qar túsken, dep habarlaıdy Dalanews.kz.
Qalanyń qalypty tirshilik yrǵaǵyn saqtap, kólik qozǵalysynyń qaýipsiz ári úzdiksiz júrýin qamtamasyz etý, sondaı-aq, qolaısyz aýa raıynyń saldaryn barynsha azaıtý maqsatynda komýnaldyq qyzmet kóshelerdi qardae aryltý jumystaryn kúsheıtilgen rejımde júrgizip jatyr.
16 qańtardan beri jol boıyna, qıylystarǵa, eńis pen órge, jolaıyryqtaryna taıǵaqqa qarsy arnaıy qospa sebý jumystary jalǵasyp keledi.
Osy ýaqyt aralyǵynda qalanyń magıstraldyq kóshelerinen, qalalyq mańyzy bar joldar men jolaıyryqtardan 105 myń tekshe metr qar shyǵaryldy.
23 qańtar kúni kúndiz qala kóshelerin qar qursaýynan aryltýǵa 75 jedel brıgada, 2 479 jol salasy jumysshysy jáne 923 birlik arnaıy tehnıka jumyldyryldy. Onyń ishinde "Almaty Tazalyq" MKK-niń 1 769 qyzmetkeri men 649 tehnıkasy, sondaı-aq, jeke merdiger uıymdardyń 710 jumysshysy men 274 tehnıkasy bar.
Jol jıegi men oǵan irgeles aýmaqtarda qardy jınaý, sypyrý, qardy bir jerge úıip jınaý jumystary júrgizilip, 2 800 tonna taıǵaqqa qarsy materıal sebildi, sondaı-aq 5 220 tekshe metr qar qala aýmaǵynan shyǵaryldy.
23 qańtardan 24 qańtarǵa qaraǵan túni de jumystar bir sátke tolastaǵan joq. Bul ýaqytta 851 jol salasy jumysshysy ("Almaty Tazalyq" MKK – 556 adam, jeke merdigerler – 295 adam) men 631 birlik arnaıy tehnıka ("Almaty Tazalyq" MKK – 476 birlik, jeke merdigerler – 155 birlik) qala kóshelerin tazalaýǵa tartyldy.
Qala kóshelerin tazalaý barysy táýlik boıy qatań baqylaýda. Osy maqsatta Almatynyń 24 ýchaskesinde merdiger uıymdardyń tehnıkasy men jumysshy brıgadalary qar shyǵarý jumystaryn úzdiksiz jalǵastyryp otyr.
Qazirgi tańda barlyq merdiger uıym kúsheıtilgen jumys tártibine kóshirilip, kóshe boıyn tazalaý jumystary táýlik boıy toqtaýsyz jalǵasyp keledi.
