Qyzylorda oblysy Qazaly aýdanyndaǵy Sarbulaq aýylyna aýyz sý qosý rásimi ótip, oǵan Parlament Senatynyń depýtaty Naýryzbai Baiqadamov, oblystyq máslihat tóraǵasy Murat Tleýmbetov, ziialy qaýym ókilderi men aýyl turǵyndary qatysty.
Oblystyq máslihat tóraǵasy sarybulaqtyqtardy quttyqtap, aýyldarǵa, ásirese shalǵai eldi mekenderge infraqurylym igilikterin jetkizýdegi jetistikterdi atap ótti.
«Syr eliniń bas shaharynda ótken, egemen elimizdiń bolashaǵy úshin mańyzdy sheshimder qabyldanǵan Ulttyq quryltaidyń besinshi otyrysy tarihymyzǵa altyn árippen jazyldy. Qabyldanǵan sheshimder halqymyzdyń bolashaqqa degen senimin arttyryp, ult birligin nyǵaitady.
Alqaly jiynda Memleket basshysy Qasym-Jomart Kemeluly: «Sońǵy jyldary Qyzylorda oblysy zaman talabyna sai ósip-órkendep jatyr» dep, Cyr óńirinde atqarylǵan jumystarǵa oń baǵasyn berdi.
«Qýatty óńirler – qýatty el» qaǵidaty shalǵai eldi mekenderge aýyz sý, gaz tartylýyna, jol men zamani áleýmettik nysandar salynyp, turmys sapasyn jaqsartýǵa oń yqpal etýde.
Osy oraida Sarbulaq aýylyn taza aýyz sý jelisine qosý jumystarymen ainalysqan merdiger «Dáneker» mekemesine, igi iske atsalysqan barsha azamattarǵa shynaiy rizashylyǵymdy bildiremin. Taza aýyz sýdyń kelýi turǵyndardyń áleýmettik jaǵdaiyn jaqsarta túsedi senemiz», – dedi Murat Jolkeldiuly.
Rásimde aýyldyń órkendeýine úles qosqan aǵa býyn ardagerlerge, aýyz sý júrgizgen merdiger mekeme qyzmetkerlerine oblys ákiminiń Alǵys haty tabystaldy. Naýryzbai Seitqaliuly sóz sóilep, aýyl aqsaqaly Serdaly Saǵymbaev batasyn berdi.
Prezident tapsyrmasymen memleketke qaitarylǵan aktivter esebinen aimaqta densaýlyq saqtaý, bilim berý, sport jáne kommýnaldyq infraqurylymdy jańǵyrtý baǵytynda áleýmettik jobalar júzege asýda.
Atalǵan joba aiasynda Sarbulaq, Shili, Sháken jáne Shitúbek eldi mekenderin aýyz sý jelisine qosýǵa respýblikalyq, oblystyq biýdjetten jáne qaitarylǵan aktivter esebinen 1,5 mlrd. teńge qarjy bólinip, búginde qurylys jumystary tolyq aiaqtaldy.
Endi Sarbulaq aýylyna taza aýyz sý kelip, shalǵai eldi mekenniń turǵyndary kópten kútken igilikke qol jetkizdi. Nátijesinde Qazaly aýdanynyń halqy 100 paiyz taza aýyz sýmen qamtyldy.
Aita keteiik, ótken jyly Qazaly aýdanynyń biýdjeti 27 mlrd teńgege jetti. Al sońǵy úsh jyl ishinde aýdan ekonomikasyna shamamen 80 mlrd teńge kóleminde investitsiia tartylǵan.
2022-2024 jyldary «Aýyl – el besigi» jobasy aiasynda 31 mlrd. 600 mln. teńgege óńirdegi 78 aýyldyń áleýmettik, injenerlik infraqurylymyn damytýǵa baǵyttalǵan 343 joba júzege asty. Ótken jyly 41 eldi mekendegi 66 jobaǵa 15 mlrd. 155 mln. teńge qaraldy. Memleket basshysynyń eldi mekenderdi túgeldei ortalyqtandyrylǵan sapaly aýyz sýmen qamtamasyz etý tapsyrmasy 100 paiyz oryndaldy.
