12–13 qyrkúiek kúnderi Astana qalasynda «Creative Aimaq» respýblikalyq jobasy aiasynda «Tamyrdan týyndyǵa…» atty kórme-jármeńke ótip jatyr, dep habarlaidy dalanews.kz.
Sharaǵa QR Mádeniet jáne aqparat vitse-ministrleri Evgenii Kochetov, Aibek Sydyqov, Kreativti indýstriialardy damytý qorynyń basqarma tóraǵasy Erlan Qanalimov, oblys ákiminiń orynbasary Meirambek Shermaǵanbet jáne ziialy qaýym men BAQ ókilderi, elordalyq turǵyndar qatysty.
Joba Syr óńiriniń bai tarihi-mádeni murasyn zamanaýi shyǵarmashylyqpen sabaqtastyryp, ulttyq qundylyqtardy jańa formatta tanytýǵa jáne tyń ideialardy júzege asyrýǵa arnalǵan.
Is-sharaǵa 100-ge jýyq kreator qatysyp, 21 ekonomikalyq qyzmet baǵyty boiynsha avtorlyq týyndylary men shyǵarmashylyq ónimderin kópshilik nazaryna usynýda. Kelýshiler Syr boiynyń basty brendteriniń birine ainalǵan aq kúrishten salynǵan beineleý óneri týyndylarymen tanysa alady. Shyǵarmalar kúrishtiń óńir tarihy men turmysyndaǵy mańyzyn, Syr eliniń tabiǵaty men mádeni ereksheligin tanytady.
Sonymen qatar, kórmege dástúrli qolóner mádenietin dáripteitin súiek, aǵash jáne kiizden jasalǵan ulttyq buiymdar qoiylǵan. Ár buiymda Syr boiyna tán ulttyq naqysh, dástúrli órnek jáne tabiǵi materialdardy óńdeýdiń ózindik sheberligi kórinis tapqan.
Kreativti alańda Qyzylorda Hub mamandary óz jobalaryn, «Qyzylorda» telearnasy «Syr Travel», «Qyzylorda Expedition», «Qudaiy qonaq» sekildi kreativti jobalaryn tanystyrady.
Sonymen qatar, eki kún boiy Qazaq Creative Hub alańynda Syr óńiriniń ónerpazdary jasandy intellekt tehnologiialaryn shyǵarmashylyqpen ushtastyrǵan kontserttik baǵdarlamasyn kópshilik nazaryna usynady.
Aita keteiik, aimaqta kreativti indýstriiany damytý baǵytynda belsendi jumys istep kele jatqan 146 kreatordyń 120-sy, iaǵni 82,2 paiyzy respýblikalyq kreatorlar reestrine engizilgen. Bul kórsetkish Qyzylorda oblysyn respýblika óńirleri arasynda alǵashqy úshtikke ornyqtyrdy.
