قىزىلوردا وبلىسى قازالى اۋدانىنداعى ساربۇلاق اۋىلىنا اۋىز سۋ قوسۋ ءراسىمى ءوتىپ، وعان پارلامەنت سەناتىنىڭ دەپۋتاتى ناۋرىزباي بايقاداموۆ، وبلىستىق ءماسليحات ءتوراعاسى مۇرات تلەۋمبەتوۆ، زيالى قاۋىم وكىلدەرى مەن اۋىل تۇرعىندارى قاتىستى.

وبلىستىق ءماسليحات ءتوراعاسى سارىبۇلاقتىقتاردى قۇتتىقتاپ، اۋىلدارعا، اسىرەسە شالعاي ەلدى مەكەندەرگە ينفراقۇرىلىم يگىلىكتەرىن جەتكىزۋدەگى جەتىستىكتەردى اتاپ ءوتتى.

«سىر ەلىنىڭ باس شاھارىندا وتكەن، ەگەمەن ەلىمىزدىڭ بولاشاعى ءۇشىن ماڭىزدى شەشىمدەر قابىلدانعان ۇلتتىق قۇرىلتايدىڭ بەسىنشى وتىرىسى تاريحىمىزعا التىن ارىپپەن جازىلدى. قابىلدانعان شەشىمدەر حالقىمىزدىڭ بولاشاققا دەگەن سەنىمىن ارتتىرىپ، ۇلت بىرلىگىن نىعايتادى.

القالى جيىندا مەملەكەت باسشىسى قاسىم-جومارت كەمەل ۇلى: «سوڭعى جىلدارى قىزىلوردا وبلىسى زامان تالابىنا ساي وسىپ-وركەندەپ جاتىر» دەپ، Cىر وڭىرىندە اتقارىلعان جۇمىستارعا وڭ باعاسىن بەردى.

«قۋاتتى وڭىرلەر – قۋاتتى ەل» قاعيداتى شالعاي ەلدى مەكەندەرگە اۋىز سۋ، گاز تارتىلۋىنا، جول مەن زاماني الەۋمەتتىك نىساندار سالىنىپ، تۇرمىس ساپاسىن جاقسارتۋعا وڭ ىقپال ەتۋدە.
وسى ورايدا ساربۇلاق اۋىلىن تازا اۋىز سۋ جەلىسىنە قوسۋ جۇمىستارىمەن اينالىسقان مەردىگەر «دانەكەر» مەكەمەسىنە، يگى ىسكە اتسالىسقان بارشا ازاماتتارعا شىنايى ريزاشىلىعىمدى بىلدىرەمىن. تازا اۋىز سۋدىڭ كەلۋى تۇرعىنداردىڭ الەۋمەتتىك جاعدايىن جاقسارتا تۇسەدى سەنەمىز»، – دەدى مۇرات جولكەلدى ۇلى.

راسىمدە اۋىلدىڭ وركەندەۋىنە ۇلەس قوسقان اعا بۋىن ارداگەرلەرگە، اۋىز سۋ جۇرگىزگەن مەردىگەر مەكەمە قىزمەتكەرلەرىنە وبلىس اكىمىنىڭ العىس حاتى تابىستالدى. ناۋرىزباي سەيتقالي ۇلى ءسوز سويلەپ، اۋىل اقساقالى سەردالى ساعىمبايەۆ باتاسىن بەردى.

پرەزيدەنت تاپسىرماسىمەن مەملەكەتكە قايتارىلعان اكتيۆتەر ەسەبىنەن ايماقتا دەنساۋلىق ساقتاۋ، ءبىلىم بەرۋ، سپورت جانە كوممۋنالدىق ينفراقۇرىلىمدى جاڭعىرتۋ باعىتىندا الەۋمەتتىك جوبالار جۇزەگە اسۋدا.

اتالعان جوبا اياسىندا ساربۇلاق، ءشيلى، شاكەن جانە شيتۇبەك ەلدى مەكەندەرىن اۋىز سۋ جەلىسىنە قوسۋعا رەسپۋبليكالىق، وبلىستىق بيۋدجەتتەن جانە قايتارىلعان اكتيۆتەر ەسەبىنەن 1،5 ملرد. تەڭگە قارجى ءبولىنىپ، بۇگىندە قۇرىلىس جۇمىستارى تولىق اياقتالدى.

ەندى ساربۇلاق اۋىلىنا تازا اۋىز سۋ كەلىپ، شالعاي ەلدى مەكەننىڭ تۇرعىندارى كوپتەن كۇتكەن يگىلىككە قول جەتكىزدى. ناتيجەسىندە قازالى اۋدانىنىڭ حالقى 100 پايىز تازا اۋىز سۋمەن قامتىلدى.

ايتا كەتەيىك، وتكەن جىلى قازالى اۋدانىنىڭ بيۋدجەتى 27 ملرد تەڭگەگە جەتتى. ال سوڭعى ءۇش جىل ىشىندە اۋدان ەكونوميكاسىنا شامامەن 80 ملرد تەڭگە كولەمىندە ينۆەستيسيا تارتىلعان.
2022-2024 جىلدارى «اۋىل – ەل بەسىگى» جوباسى اياسىندا 31 ملرد. 600 ملن. تەڭگەگە وڭىردەگى 78 اۋىلدىڭ الەۋمەتتىك، ينجەنەرلىك ينفراقۇرىلىمىن دامىتۋعا باعىتتالعان 343 جوبا جۇزەگە استى. وتكەن جىلى 41 ەلدى مەكەندەگى 66 جوباعا 15 ملرد. 155 ملن. تەڭگە قارالدى. مەملەكەت باسشىسىنىڭ ەلدى مەكەندەردى تۇگەلدەي ورتالىقتاندىرىلعان ساپالى اۋىز سۋمەن قامتاماسىز ەتۋ تاپسىرماسى 100 پايىز ورىندالدى.