Qaraǵandy oblysynyń Buqar jyraý aýdanynda bastalǵan dala órti Baianaýyl memlekettik ulttyq tabiǵi parkiniń aýmaǵyna ótti, dep habarlaidy dalanews.kz.
Órt 14 qyrkúiekte saǵat 11:58-de Buqar jyraý aýdany aýmaǵynda, Baianaýyl ulttyq parkiniń shekarasyna jaqyn jerde qurǵaq shóptiń tutanýynan bastalǵan. Saǵat 20:40-ta jalyn ulttyq park aýmaǵyna jetken.
Órt Dalbin bólimshesiniń 16-oramyndaǵy 5-bólikte tirkelgen. Jalynnyń 24 jáne 28-oramdardyń jekelegen ýchaskelerine taralý qaýpi bolǵan.
Órtti sóndirýge Baianaýyl ulttyq parkiniń, «Ertis Ormany» rezervatynyń, Tótenshe jaǵdailar qyzmetiniń, Ekibastuz qalasy men Maiqaiyń kentiniń kúshteri men tehnikasy, sondai-aq Pavlodar oblystyq orman inspektsiiasynyń mamandary jumyldyryldy.
Órtti áýeden baqylaý úshin tikushaq pen eki desantshy tartyldy.
Qazir órtti oqshaýlaý jáne tolyq sóndirý jumystary jalǵasyp jatyr. Jaǵdai baqylaýda. Baianaýyl ulttyq parki erekshe qorǵalatyn tabiǵi aýmaq sanalady, onyń aýmaǵy 68,4 myń gektardan asady.
