Jetisýdyń jetekshi Panfilov aýdanynyń áleýmettik-ekonomikalyq áleýeti joǵary. Investitsiia, óndiris, aýyl sharýashylyǵy, infraqurylym salasynda úzdikter qatarynda, dep habarlaidy Dalanews.kz.
Aýdannyń taǵy bir áleýetti baǵyty – baý-baqsha sharýashylyǵy. Oblystaǵy baq alqaptarynyń 44%-dan astamy, 2,3 myń ga jer Panfilov aýdanynda ornalasqan. Munda jalpy syiymdylyǵy 8,5 myń tonna bolatyn 8 jemis saqtaý qoimasy bar. Sonymen qatar aýmaǵy 1 gektardy qamtityn «QazGeoTerm» jylyjai kesheni jumys isteidi. Jyl basynan beri aýdannyń agroónerkásip keshenine 1,9 mlrd teńge investitsiia tartylyp, kórsetkish 1,7 esege artty. Degenmen oblys ákimi óndirilgen ónimdi qaita óńdeý úlesin arttyrý qajettigin atap ótip, taýarly sút, et, qus fermalaryn salý, aýyl sharýashylyǵy ónimderin óńdeitin kásiporyndar ashý jóninde naqty tapsyrmalar júktedi. Oǵan qosa «Jarkent Frýkt» JShS qyzmetkerleriniń eńbekaqy máselesin jaqyn merzimde sheshý mindetteldi.
Memleket tarapynan kórsetilip otyrǵan qoldaýdyń nátijesinde aýdandiqandary «QazAgroQarjy» AQ arqyly 512 mln teńgege 28 birlik aýyl sharýashylyǵy tehnikasyn satyp aldy. «Keń dala–2» baǵdarlamasy aiasynda 31 sharýashylyqqa 394 mln teńge kóleminde jeńildetilgen nesie berildi.
«Panfilov aýdanynda gazdandyrýǵa jatatyn 26 eldi meken bar. Búginde Jarkent qalasy tolyq tabiǵi gazǵa qosylǵan. Qalǵan 25 eldi mekenge qatysty jumystar jalǵasyp jatyr, olardyń 12-sinde qurylys aiaqtalǵan. Avat, Aqkent, Nádek aýyldaryna kógildir otyn jetkizildi. Jyl sońyna deiin aýdan eldi mekenderiniń teń jartysy gaz igiligin kóredi. Qalǵan 13 aýylda aýylishilik gaz taratý jelileri júrgiziledi. Nátijesinde, biyl aýdan halqynyń 85%-y tabiǵi gazǵa qol jetkizedi», – deidi aýdan basshysy.
Keiingi jyldary Panfilov aýdanynda áleýmettik infraqurylymdy damytýǵa airyqsha kóńil bólinip otyr. Densaýlyq saqtaý salasynda eki jyl ishinde 18 nysan boi kóterip, 3 mekeme kúrdeli jóndeýden ótti. Alys aýyldarǵa kelgen 17 jas dárigerge 135 mln teńge kóleminde kóterme járdemaqy berildi. Aýdannyń túrli eldi mekenderinde dárigerlik ambýlatoriialar, feldsherlik-akýsherlik, meditsinalyq pýnktter salyndy. Sonymen qatar aýdandyq aýrýhananyń kúndizgi statsionary jóndelip, negizgi ǵimaratty qalpyna keltirý men jańa blok salý jumystary bastaldy. Bul nysandar biyl paidalanýǵa beriledi.
«Materialdyq-tehnikalyq bazany nyǵaitý maqsatynda 2024–2025 jyldary aýdandyq aýrýhana men birqatar aýylǵa 6 sanitarlyq avtokólik berilip, 13 zamanaýi meditsinalyq qural jetkizildi. Bilim salasynda da oń ózgerister bar. Jarkent qalasynda 1 200 oryndyq jańa mektep salyndy, Taldy aýylynda 300 oryndyq mektep paidalanýǵa berildi. Qazirde Suptai aýylynda 120 oryndyq mekteptiń qurylysy júrip jatyr. Mádeniet, sport salasynda da jańa nysandar el igiligine berildi. Turpan aýylyndaǵy mádeniet úii jóndelip, Úsharal, Kóktal aýyldarynda zamanaýi sport keshenderi ashyldy», deidi aýdan ákimi.
Ótken jyldyń qorytyndysy boiynsha Panfilov aýdany oblystaǵy eń úzdik aýdan atandy. Bul mejege Qaratal aýdany da jaqyn tur. Qos aýdannyń ekonomikasy ártaraptanyp, shaǵyn jáne orta biznes damyp keledi.
