Qyzylorda oblysynyń ákimi Nurlybek Nálibaev, QR Parlamenti Senatynyń depýtaty Naýryzbai Baiqadamov, oblys prokýrory Rizabek Ojarov,ziialy qaýym ókilderi men ardagerler Qazaly aýdanynyń Áiteke bi kentindegi temirjol arqyly ótetin aspaly kópirdiń ashylý rásimine qatysty, dep habarlaidy Dalanews.kz
Aimaq basshysy jinalǵan jurtshylyqty quttyqtap, jol infraqurylymyn damytýdaǵy aýqymdy jumystardy atap ótti.
«Býrabaida ótken Ulttyq quryltaida Prezidentimiz Qasym-Jomart Kemeluly: «Jer kólemi jóninen álemde toǵyzynshy oryn alatyn elimizdiń kólik-tranzit salasynda zor múmkindikteri bar. Bul – airyqsha nazar aýdarýdy talap etetin strategiialyq baǵyt», – degen bolatyn.
Osy maqsatta óńirimizde belsendi jumystar atqarylýda. Memleket basshymyzdyń, Úkimettiń erekshe qoldaýymen 2022-2025 jyldary 1 600 shaqyrym avtomobil joldary men kóshelerdi, 30 kópir ótkelin salýǵa, kúrdeli jóndeýge 150 mlrd. teńgege jýyq qarjy bólindi. Ótken jyldyń ózinde jol infraqurylymyn damytýǵa biýdjetten 50 mlrd. 605 mln. teńge qaralyp, 329 shaqyrym avtomobil joldary, kósheler men kópir ótkelderi jóndeýden ótýde.
Qazaly vokzaly janyndaǵy 1,3 mlrd teńgege salynǵan temirjol ústinen ótetin aspaly kópir – osyndai baiypty bastamalardyń jalǵasy. Búgin el igiligine tabystalatyn jaiaý júrginshilerge arnalǵan kópirdi Áiteke bi kentiniń arǵy betinde turatyn 13 myńnan astam turǵyn qoldanady. Bul ótkel arqyly 2 myńnan astam adam kúndelikti árli-berli qatynaidy. Sondyqtan da jurtshylyqtyń temirjoldan qaýipsiz ári tez ótýine tigizer paidasy ushan-teńiz.
Kópirdi sapaly etip salyp, merziminde aiaqtaǵan merdiger «QazTemirjol Engineering» JShS-niń qurylysshylaryna alǵys bildiremiz. Qýanyshtaryńyz qutty bolsyn! Jańa kópir jaqsylyqtyń bastaýy bolǵai!», – dedi Nurlybek Mashbekuly.
Rásimde «Qurmet» ordeniniń iegeri, Qazaly aýdanynyń qurmetti azamaty Orazǵali Bekbanov bata berdi. Temirjol salasynda eńbek etetin mamandar men kópir qurylysyn salǵan merdiger mekeme ókilderi oblys ákiminiń Alǵys hatymen marapattaldy.
Keiingi jyldary temirjoldan ótetin kólik jáne jolaýshy qozǵalysyn retteý máselesi aspaly kópir salý arqyly sheshimin taýyp keledi. Halyq uzaq jyldar boiy kútken Aral qalasyndaǵy, Jańaqorǵan kentindegi temirjol ústinen ótetin kópirler paidalanýǵa berildi.
Búginde 4 mlrd. 700 mln. teńgege oblys ortalyǵyndaǵy Janqoja batyr kóshesi arqyly ótetin temirjol asty avtojoly qurylysy qarqyndy júrýde. Endigi kezekte sol jaǵalaýǵa aparatyn ekinshi kópir salý jobasy qolǵa alyndy. Qazir joba-smetalyq qujattama ázirlenýde.
Qarmaqshy aýdanynyń Josaly kentinde 5 mlrd. 515 mln.teńgege temirjol arqyly ótetin kópir qurylysy jaqyn ýaqytta bastalady.
