Qazaqstandyq UFC sportshysy Shavkat Rahmonovtyń jubaiy jol-kólik oqiǵasy boiynsha kúdikti dep tanyldy. Bul týraly Ishki ister ministriniń orynbasary Sanjar Ádilov málimdedi, dep habarlaidy Dalanews.kz.
Buǵan deiin Gúlaiym Rahmonova atalǵan is boiynsha qorǵanýǵa quqyǵy bar kýáger retinde tirkelgen bolatyn.
Eske salaiyq, Gúlaiym Rahmonova men onyń uly 2025 jyly 27 shildede jol apatyna túsken edi.
Politsiianyń málimetinshe, respýblikalyq mańyzy bar Almaty – Ekaterinbýrg avtojolynyń 299-shaqyrymynda Toyota Land Cruiser 200 kóliginiń júrgizýshisi Qaraǵandy oblysy baǵytynan Almatyǵa qarai kele jatyp, rólge ie bola almai, kólikti aýdaryp alǵan. Jol apaty saldarynan eki áiel qaza tapqan.
Buǵan deiin Ádilov Rahmonovtyń jubaiyna qatysty jol apatyn tergeý aiaqtalýǵa jaqyn ekenin habarlaǵan edi.
Senat kýlýarynda jýrnalisterdiń suraqtaryna jaýap bergen ol, atalǵan qylmystyq istiń Qazaqstan Respýblikasynyń Qylmystyq kodeksiniń 345-baby, 3-bóligi boiynsha tergelip jatqanyn eske saldy.
«Qazir tergeý áreketteriniń basym bóligi aiaqtaldy, sońǵy keshendi avtotehnikalyq saraptamanyń qorytyndysyn kútip otyrmyz. Nátijelerge sáikes aiyp taǵý jáne isti sotqa joldaý týraly sheshim qabyldaimyz», - dedi ishki ister ministriniń orynbasary Sanjar Ádilov.
