Kólik ministri Nurlan Saýranbaev aqaýy bar aqyly joldardy ýaqytsha tegin etý jáne mundai joldardyń tizimin jariialaý máselesine qatysty qoiylǵan suraqqa naqty jaýap bermedi, dep habarlaidy Dalanews.kz.
Baspasóz brifingi barysynda jýrnalist ministrliktiń barlyq aqyly jolǵa taldaý júrgizip, kemshilikter anyqtalǵan jaǵdaida ol ýchaskelerden aqy alynbaityny jóninde buryn aitylǵan málimdemesin eske saldy. Sondai-aq, aqaýy bar joldardyń naqty tizimi qashan jariialanatynyn surady.
Alaida ministr bul málimdemeni jeke ózi aitqanyn joqqa shyǵaryp, óz tarapynan mundai ýáde berilmegenin jetkizdi. Degenmen ol jýrnalist kótergen másele oryndy ekenin moiyndady.
Eske salaiyq, 2025 jylǵy 15 qyrkúiekten bastap respýblikalyq mańyzy bar aqyly joldarda tólem erejeleri ózgerdi. Qazir elimizde barlyǵy 27 aqyly jol bar. Buǵan deiin aqyly jolda jol qozǵalysy qaýipsizdigine áser etetin jáne jóndeýdi talap etip turǵan ýchaske bolsa, dál sol aralyq úshin jóndeý jumystary tolyq aiaqtalǵanǵa deiin tólemaqy alynbaityny aityldy.
