Almatyda 16 qańtar kúni tańǵy saǵat 07:00-de jaýa bastaǵan qar 18 qańtar kúni saǵat 04:00-ge deiin tolastamai, osy aralyqta shahar aýmaǵyna 18 santimetr qar tústi. 23 qańtar kúni túngi saǵat 01:30-dan bastap qalada qar qaita jaýa bastady. Ol 23:00-ge deiin jalǵasady dep boljanyp otyr. Keshki saǵat 20:00-degi málimetke sáikes Almatyda 8 santimetr qar túsken, dep habarlaidy Dalanews.kz.
Qalanyń qalypty tirshilik yrǵaǵyn saqtap, kólik qozǵalysynyń qaýipsiz ári úzdiksiz júrýin qamtamasyz etý, sondai-aq, qolaisyz aýa raiynyń saldaryn barynsha azaitý maqsatynda kommýnaldyq qyzmet kóshelerdi qardae aryltý jumystaryn kúsheitilgen rejimde júrgizip jatyr.
16 qańtardan beri jol boiyna, qiylystarǵa, eńis pen órge, jolaiyryqtaryna taiǵaqqa qarsy arnaiy qospa sebý jumystary jalǵasyp keledi.
Osy ýaqyt aralyǵynda qalanyń magistraldyq kóshelerinen, qalalyq mańyzy bar joldar men jolaiyryqtardan 105 myń tekshe metr qar shyǵaryldy.
23 qańtar kúni kúndiz qala kóshelerin qar qursaýynan aryltýǵa 75 jedel brigada, 2 479 jol salasy jumysshysy jáne 923 birlik arnaiy tehnika jumyldyryldy. Onyń ishinde "Almaty Tazalyq" MKK-niń 1 769 qyzmetkeri men 649 tehnikasy, sondai-aq, jeke merdiger uiymdardyń 710 jumysshysy men 274 tehnikasy bar.
Jol jiegi men oǵan irgeles aýmaqtarda qardy jinaý, sypyrý, qardy bir jerge úiip jinaý jumystary júrgizilip, 2 800 tonna taiǵaqqa qarsy material sebildi, sondai-aq 5 220 tekshe metr qar qala aýmaǵynan shyǵaryldy.
23 qańtardan 24 qańtarǵa qaraǵan túni de jumystar bir sátke tolastaǵan joq. Bul ýaqytta 851 jol salasy jumysshysy ("Almaty Tazalyq" MKK – 556 adam, jeke merdigerler – 295 adam) men 631 birlik arnaiy tehnika ("Almaty Tazalyq" MKK – 476 birlik, jeke merdigerler – 155 birlik) qala kóshelerin tazalaýǵa tartyldy.
Qala kóshelerin tazalaý barysy táýlik boiy qatań baqylaýda. Osy maqsatta Almatynyń 24 ýchaskesinde merdiger uiymdardyń tehnikasy men jumysshy brigadalary qar shyǵarý jumystaryn úzdiksiz jalǵastyryp otyr.
Qazirgi tańda barlyq merdiger uiym kúsheitilgen jumys tártibine kóshirilip, kóshe boiyn tazalaý jumystary táýlik boiy toqtaýsyz jalǵasyp keledi.
