Qazaqstanda 2026 jyldan bastap mindetti avtosaqtandyrý tártibi jańarady. Bul ózgerister alǵash ret saqtandyrý polisin rásimdeitinderge de, burynnan kólik tizgindep júrgenderge de qatysty. Mán-jaidy Fingramota.kz jazdy, dep habarlaidy Dalanews.kz.
Bazalyq tarif ulǵaiady
2026 jyly kólik ieleriniń azamattyq-quqyqtyq jaýapkershiligin mindetti saqtandyrýdyń bastapqy baǵasy shamamen 8 217 teńge bolady. Bul 1 qańtardan bastap ailyq eseptik kórsetkish 4 325 teńge deńgeiinde belgilenýine bailanysty.
Degenmen bul bastapqy soma ǵana. Polistiń túpkilikti quny arnaiy túzetý koeffitsientteri arqyly esepteledi. Kóliktiń tirkelgen óńiri, júrgizýshiniń jasy men tájiribesi, kólik túri, sondai-aq, buryn bolǵan jol-kólik oqiǵalary eskeriledi.
Óńirlerge qarai aiyrmashylyq bolady
2026 jyldan bastap óńirlik koeffitsientter jol apatynyń jiiligine qarai qaita qaralady. Apat jii bolatyn aimaqtarda saqtandyrý quny ósse, keibir óńirde ózgerissiz qalýy múmkin. Osylaisha birdei bazalyq tarifke qaramastan, polis baǵasy óńirge bailanysty ártúrli bolady.
Jańa júrgizýshilerge qoldaý kórsetiledi
Júiedegi mańyzdy jańalyqtardyń biri avtosaqtandyrýdy alǵash ret rásimdeitinderge qatysty. 2026 jyldan bastap jańa júrgizýshiler úshin tarifter tómendetiledi. Bul sheshim jas júrgizýshilerge túsetin salmaqty azaityp, saqtandyrýdy barynsha qoljetimdi etýge baǵyttalǵan.
Polis rásimdegende neni tekserý qajet?
Mamandar saqtandyrý kompaniiasynyń litsenziiasy bar-joǵyn anyqtaýǵa, sharttaǵy tólem talaptary men limitterin muqiiat oqýǵa keńes beredi.
