قازاقستاندا 2026 جىلدان باستاپ مٸندەتتٸ اۆتوساقتاندىرۋ تەرتٸبٸ جاڭارادى. بۇل ٶزگەرٸستەر العاش رەت ساقتاندىرۋ پوليسٸن رەسٸمدەيتٸندەرگە دە, بۇرىننان كٶلٸك تٸزگٸندەپ جٷرگەندەرگە دە قاتىستى. مەن-جايدى Fingramota.kz جازدى, دەپ حابارلايدى Dalanews.kz.
بازالىق تاريف ۇلعايادى
2026 جىلى كٶلٸك يەلەرٸنٸڭ ازاماتتىق-قۇقىقتىق جاۋاپكەرشٸلٸگٸن مٸندەتتٸ ساقتاندىرۋدىڭ باستاپقى باعاسى شامامەن 8 217 تەڭگە بولادى. بۇل 1 قاڭتاردان باستاپ ايلىق ەسەپتٸك كٶرسەتكٸش 4 325 تەڭگە دەڭگەيٸندە بەلگٸلەنۋٸنە بايلانىستى.
دەگەنمەن بۇل باستاپقى سوما عانا. پوليستٸڭ تٷپكٸلٸكتٸ قۇنى ارنايى تٷزەتۋ كوەففيتسيەنتتەرٸ ارقىلى ەسەپتەلەدٸ. كٶلٸكتٸڭ تٸركەلگەن ٶڭٸرٸ, جٷرگٸزۋشٸنٸڭ جاسى مەن تەجٸريبەسٸ, كٶلٸك تٷرٸ, سونداي-اق, بۇرىن بولعان جول-كٶلٸك وقيعالارى ەسكەرٸلەدٸ.
ٶڭٸرلەرگە قاراي ايىرماشىلىق بولادى
2026 جىلدان باستاپ ٶڭٸرلٸك كوەففيتسيەنتتەر جول اپاتىنىڭ جيٸلٸگٸنە قاراي قايتا قارالادى. اپات جيٸ بولاتىن ايماقتاردا ساقتاندىرۋ قۇنى ٶسسە, كەيبٸر ٶڭٸردە ٶزگەرٸسسٸز قالۋى مٷمكٸن. وسىلايشا بٸردەي بازالىق تاريفكە قاراماستان, پوليس باعاسى ٶڭٸرگە بايلانىستى ەرتٷرلٸ بولادى.
جاڭا جٷرگٸزۋشٸلەرگە قولداۋ كٶرسەتٸلەدٸ
جٷيەدەگٸ ماڭىزدى جاڭالىقتاردىڭ بٸرٸ اۆتوساقتاندىرۋدى العاش رەت رەسٸمدەيتٸندەرگە قاتىستى. 2026 جىلدان باستاپ جاڭا جٷرگٸزۋشٸلەر ٷشٸن تاريفتەر تٶمەندەتٸلەدٸ. بۇل شەشٸم جاس جٷرگٸزۋشٸلەرگە تٷسەتٸن سالماقتى ازايتىپ, ساقتاندىرۋدى بارىنشا قولجەتٸمدٸ ەتۋگە باعىتتالعان.
پوليس رەسٸمدەگەندە نەنٸ تەكسەرۋ قاجەت?
ماماندار ساقتاندىرۋ كومپانيياسىنىڭ ليتسەنزيياسى بار-جوعىن انىقتاۋعا, شارتتاعى تٶلەم تالاپتارى مەن ليميتتەرٸن مۇقييات وقۋعا كەڭەس بەرەدٸ.
