Prezident Qysqy Olimpiada oiyndary men Paralimpiadaǵa qatysatyn ulttyq qurama múshelerine Memlekettik týdy tapsyrdy, dep habarlaidy Dalanews.kz.
Qasym-Jomart Toqaev dúnie júziniń eń myqty sportshylary baq synaityn Italiiadaǵy XXV Qysqy Olimpiada oiyndary men XIV Qysqy Paralimpiadany airyqsha mańyzdy oqiǵa dep atady.
– Olimpiada oiyndaryna 40-qa jýyq sportshymyz qatysady. Olar sporttyń 10 túrinen jarysqa túsedi. Ulttyq qurama músheleriniń jartysynan kóbi Olimpiadaǵa alǵash ret bara jatyr. Jahandyq báseke sizder úshin zor múmkindik ári úlken synaq bolmaq. Qysqy Olimpiadaǵa joldama alý úshin sportshylarymyz kóptegen belesten ótti. Túrli halyqaralyq jarysta tabysty óner kórsetip, 17 altyn, 31 kúmis jáne 21 qola medalǵa ie boldy. Sonymen birge biz Paralimpiada oiyndarynda el abyroiyn qorǵaityn sportshylarymyzǵa zor senim artamyz. Paralimpiadashylardyń erekshe qulshynysy jáne myqty erik-jigeri kópke úlgi. Naýryz aiynyń basynda Italiiada ótetin Paralimpiada oiyndaryna ázirge 10 litsenziia aldyq. Litsenziia sany áli de kóbeiýi múmkin, – dedi Prezident.
Memleket basshysy tórt jylda bir ótetin bairaqty básekege qazaqstandyq sportshylar tyńǵylyqty daiyndalǵanyna toqtalyp, Qysqy Olimpiada jáne Paralimpiada oiyndarynda shyn myqtylar kúsh synasatynyn aitty.
– Árine, sportta jeńisti boljaý múmkin emes. Biraq Sizder qatań irikteýlerden súrinbei ótip, Qazaqstannyń olimpiadalyq quramasyna múshe boldyńyzdar. Osynyń ózi, Sizderdiń áleýetterińizdi, jeńiske degen umtylystaryńyzdy tanytady. Táýelsizdik alǵan ýaqyttan beri sportshylarymyz Qysqy Olimpiada oiyndarynda sheberlik tanytyp, birneshe márte jeńis tuǵyrynan kórine bildi. Vladimir Smirnov, Liýdmila Prokasheva, Elena Hrýstaleva, Denis Ten, Iýliia Galysheva siiaqty Olimpiada júldegerleriniń esimderi otandyq sport tarihyna altyn áriptermen jazyldy. Álemdik sporttaǵy iri arenalarda top jarǵan otandyq atletterdiń qurmetine talai ret Ánuran shyrqalyp, elimizdiń Týy kókte jelbiredi. Aldaǵy ýaqytta da jarqyn jeńister kútip turǵanyna senimdimin. Jaqynda Ulttyq quryltai otyrysynda atap ótkenimdei, sporttaǵy jetistikter tutas elimizdiń mártebesin kóterip, jalpyulttyq birlikti jáne Qazaqstan Respýblikasynyń qazirgi álemdegi bedelin nyǵaitady, – dedi Qasym-Jomart Toqaev.
