Aýdan ortalyǵynda ornalasqan Dańq alleiasyndaǵy saiasi qýǵyn – súrgin qurbandaryna arnaiy ornatylǵan eskertkishke gúl shoqtary qoiylyp, qurbandardy eske alý rásimi ótkizildi.
Eske alý rásimine aýdan ákimniń orynbasary M.Tóleýjanov jáne óńirdiń ziialy qaýym ókilderi, bólim – mekeme basshylary men birqatar qyzmetkerler qatysty.
Sóz alǵan aýdan ákimniń orynbasary M.Tóleýjanov:
- HH ǵasyrdyń 20-50 jyldaryndaǵy saiasi qýǵyn – súrgin zobalańy – halqymyzdyń tarihyndaǵy qasiretti kezeń. Aýyzǵa salar as pen kier kiimnen, jan jylýlyǵynan aiyrylǵan, torǵa qamalǵan totydai bir ýaqyt qanat qaǵýǵa mursha tappai japa shekken azamattarymyzdyń esimderi máńgilik júrekte qalary sózsiz. Mine, biyl el táýelsizdigine 30 jyl tolyp otyr. Táýelsiz Qazaqstannyń árbir azamaty jazyqsyz qurban bolǵan azamattardyń esimderin máńgi umytpai, olardy árqashan este saqtap, ótkenge salaýat etip, aqtandaqtar aqiqatyna tereńirek mán berip, uǵyný – búgingi urpaqtyń abyroily mindeti men paryzy bolmaq.
Jalpy, derekterge súiener bolsaq 1929 – 1933 jyldar Keńes Odaǵynda 40 millionnan astam adam saiasi qýǵyn – súrginniń qurbany bolǵan. Al, Qazaqstanǵa keler bolsaq 1921 – 1954 – shi jyldary jalǵan saiasi aiyppen 100 myńnan astam adam sottalyp, 30 myńdaiy atý jazasyna kesilgen. Tek qana, 1931 – 1933 jyldary qoldan uiymdastyrylǵan asharshylyq saldarynan 2 millionǵa jýyq qazaq azamattary qaza tapsa, qiyndyqqa qarsy tótep bere almaǵan bir millionnan astam azamattar shetel asyp ketýine májbúr boldy. Bul sol kezdegi barlyq qazaqtyń teń jarymynan astamy edi.
Qazaq tarihyndaǵy bul qasiretke bei – jai qaraý, sanamyzdan óshirý eldigimizge syn keltiretindigi belgili. Ashy tarihymyzdy bilmeý – táýelsizdik qadirin túsinbeýmen para – par. Urpaq sanasyna ótken dáýir tarihyn jańǵyrtý, halyq ziialylaryn jadymyzdan bir sát te shyǵarmaý barshamyzdyń ult aldyndaǵy azamattyq boryshymyz dep bileiik.
Qasiet ARSTAN,
Alakól aýdany ákiminiń
baspasóz-hatshysy
