Qasym-Jomart Toqaev Taza Qazaqstan aksıasy aıasynda sóz sóılep, janýarlarǵa qamqorlyq mádenıetin qalyptastyrýdyń mańyzyn atap ótti, dep habarlaıdy Dalanews.kz 

Memleket basshysy úı janýarlaryn qorǵaý jáne olarǵa qatygezdik kórsetýdiń aldyn alý máselesine erekshe toqtaldy. Onyń aıtýynsha, janýarlardy qaraýsyz qaldyrý men kóshege tastap ketý – qańǵybas ıtter sanynyń artýyna sebep bolyp otyr.

Prezıdent Úkimetke úı janýarlaryn durys kútpegenderge qatysty ákimshilik jaýapkershilikti qatańdatýdy, al olarǵa qatygezdik kórsetkenderge arnalǵan qylmystyq jazany kúsheıtýdi usyndy.

«Úı janýarlarynyń adamdardan qorlyq kórýine jol bermeý kerek», – dedi Qasym-Jomart Toqaev.

Sondaı-aq ol mamandandyrylǵan janýarlar ortalyqtarynyń jumysyn qoǵam baqylaýyna alýdyń mańyzyn aıtyp, bul baǵytta «haıpqa» jol bermeý kerektigin eskertti.

Prezıdenttiń aıtýynsha, óńirlerde qańǵybas ıtter máselesi ózekti bolyp otyr, tipti balalar men eresekterdiń de zardap shegýi jıilegen. Sondyqtan bul másele memleket pen qoǵamnyń birlesken áreketin talap etedi.

Memleket basshysy janýarlarǵa janashyrlyqpen qaraý qoǵamnyń mádenı deńgeıin kórsetetinin aıtyp, bul baǵyttaǵy bastamalar Taza Qazaqstan aıasynda jalǵasatynyn jetkizdi.