Qasym-Jomart Toqaev The National Interest basylymyna jarıalanǵan maqalasynda Qazaqstannyń jańa Konstıtýsıasy eldiń ádiletti, qýatty jáne órkendegen memleketke aınalýyna negiz bolatynyn málimdedi, dep habarlaıdy Dalanews.kz.
Prezıdenttiń aıtýynsha, jýyrda ótken respýblıkalyq referendým el damýynyń jańa kezeńin bastap berdi. Bul saıası naýqan azamattardyń memleket bolashaǵyna beıjaı qaramaıtynyn jáne mańyzdy sheshimderge tikeleı qatysýǵa daıyn ekenin kórsetti.
Memleket basshysy referendýmǵa qatysý deńgeıi joǵary bolǵanyn atap ótip, halyqtyń basym bóligi Konstıtýsıalyq reformalardy qoldaǵanyn jetkizdi. Onyń pikirinshe, bul – qoǵamnyń ádiletti ári quqyqtyq memleket qurýǵa degen suranysynyń aıqyn dáleli.
Toqaev jańa Ata zańnyń ózeginde adam quqyqtary men bostandyqtaryn qorǵaý qaǵıdaty turǵanyn aıtty. Qujatta zań ústemdigin qamtamasyz etý, sot júıesiniń táýelsizdigin kúsheıtý jáne azamattardyń quqyqtaryn qorǵaý tetikteri aıqyndalǵan.
Sonymen qatar prezıdent jańa Konstıtýsıa «Kúshti Prezıdent – yqpaldy Parlament – esep beretin Úkimet» formýlasyna negizdelgenin atap ótti. Bul model bılik tarmaqtary arasyndaǵy tepe-teńdikti qamtamasyz etip, memlekettik basqarý júıesin jetildirýge baǵyttalǵan.
Maqalada ekonomıkalyq reformalarǵa da erekshe nazar aýdarylǵan. Prezıdenttiń sózinshe, Konstıtýsıada menshik quqyǵyn qorǵaý kúsheıtilip, ınvestısıalyq ahýaldy jaqsartýǵa jáne ınovasıany damytýǵa jaǵdaı jasalǵan. Bul Qazaqstannyń halyqaralyq seriktester aldyndaǵy senimin arttyra túsedi.
Sondaı-aq Memleket basshysy aldaǵy ýaqytta Konstıtýsıaǵa engiziletin ózgerister tek jalpyhalyqtyq referendým arqyly qabyldanatynyn atap ótti. Bul eldegi demokratıalyq úderisterdi odan ári nyǵaıtýǵa múmkindik beredi.
Toqaevtyń pikirinshe, jańa Konstıtýsıa Qazaqstannyń uzaqmerzimdi damýynyń berik irgetasyna aınalyp, eldiń jahandyq básekege qabilettiligin arttyrýǵa yqpal etedi.
