Qazaqstanda naýqastarǵa otandyq DVC preparatynyń klinikalyq synaqtary júrgizile bastady. Bul týraly ǵylym jáne joǵary bilim ministri Saiasat Nurbek Úkimet otyrysynda málimdedi, dep habarlaidy Dalanews.kz.
Onyń aitýynsha, dári Nazarbayev University bazasyndaǵy Ulttyq zerthanada ázirlenip jatyr. Al jobanyń kesheýildeýi zań talaptary qatań saqtalýyna bailanysty.
Ministrdiń sózinshe, byltyr preparat adamǵa alǵashqy synaq kezeńderinen ótken. Qazir zertteýler Astanadaǵy onkologiialyq ortalyqta jalǵasyp jatyr. Sondai-aq, óńirlik ortalyqtar, onyń ishinde Qaraǵandy da qatysyp otyr.
Dárini tirkeý úshin ulttyq talaptarmen qatar halyqaralyq standarttardy da oryndaý qajet. Osyǵan bailanysty qosymsha klinikalyq synaqtar júrgizilip jatyr.
Jospar boiynsha synaqtar biyl aiaqtalady. Odan keiin preparat aldymen Qazaqstanda tirkelip, meditsinalyq tájiribede qoldanýǵa usynylady. Kelesi kezeńde halyqaralyq tirkeý rásimi bastalady.
