Abai ýniversitetiniń jas ǵalymdary otandyq ǵylymnyń damýyna úlken úles qosýda
2009 jyly Abai atyndaǵy qazaq ulttyq pedagogikalyq ýniversitetiniń «050116-Geografiia» mamandyǵy boiynsha bakalavriatyn, al 2011 jyly Magistratýra jáne PhD doktorantýra institýtynyń «6M011600-Geografiia» mamandyǵy boiynsha magistratýra bólimin támamdaǵan. Odan keiin, «6D060900-Geografiia» mamandyǵy boiynsha Ál-Farabi atyndaǵy qazaq ulttyq ýniversitetiniń doktorantýrasyn bitirip, 2017 jyly «Ońtústik Qazaqstan oblysyndaǵy agrolandshafttardyń degradatsiiasy (Otyrar aýdany mysalynda)» taqyrybyndaǵy doktorlyq dissertatsiiasyn qorǵaǵan. Jas ǵalymnyń dissertatsiialyq ǵylymi zertteý nátijelerin Túrkistan oblysyndaǵy Otyrar aýdanynyń aýylsharýashylyq basqarmasy aýylsharýashylyq salasyn basqarý, josparlaý jáne jobalaý jumystarynda paidalanýda. 2017 jyly Laishanov Shahislam QR Bilim jáne Ǵylym ministrliginiń Bilim jáne ǵylym salasyndaǵy Baqylaý komitetiniń sheshimine sáikes, 2017 jylǵy 29 maýsymdaǵy №987 buiryǵymen «6D060900-Geografiia» mamandyǵy boiynsha filosofiia doktory (PhD) dárejesin alǵan.
2014 jyly Leiptsig ýniversitetiniń Geografiia insitýtynda (Germaniia), al 2015 jyly Dokýchaev atyndaǵy topyraqtaný ǵylymi zertteý institýtynda (Resei) 2 ailyq taǵylymdamadan ótti.
2014-2018 jyldary Ó.O. Ospanov atyndaǵy Qazaq topyraqtaný jáne agrohimiia ǵylymi zertteý institýtynda jáne Ortalyq Aziia Ekologiia jáne qorshaǵan orta ǵylymi zertteý ortalyǵynda eńbek etip, ǵylymi zertteýlerdi granttyq qarjylandyrý baǵdarlamasynyń negizinde júzege asyrylatyn birneshe ǵylymi jobalardyń jaýapty oryndaýshysy bolǵan.
Al, 2015-2020 jyldary Qazaq ulttyq qyzdar pedagogikalyq ýniversitetinde oqytýshy, aǵa oqytýshy, dekannyń oqý isi jónindegi orynbasary, kafedra meńgerýshisi qyzmetterin atqardy.
2018 jyldyń mamyr aiynda «Men AEF-2018-ge baramyn» respýblikalyq baiqaýyna qatysyp, Jahandyq Astana ekonomikalyq forýmyna jeńimpaz joldamasyn jeńip aldy. Forýmnyń negizgi baǵyttaryn, onda baiandama jasaǵan álemdik ǵalymdardyń ideialaryn jastar arasynda nasihattaýǵa septigin tigizdi. Al 2020 jyly Mádeniet jáne sport ministrliginiń uiymdastyrýymen ótken «Qazaqy terminderdi halyq jasaidy» atty respýblikalyq konkýrsyna belsene qatysyp, Sport jáne mádeniet ministri A. Raiymqulovanyń alǵys hatymen marapattaldy.
2019 jyly QR BǴM janynan qurylǵan Jas ǵalymdar keńesiniń quramyna enip, sol ýaqyttan beri jas ǵalymdarmen birge elimizdiń ǵylym salasyndaǵy zańnamalyq qujattardyń, memlekettik baǵdarlamalardyń, erejelerdiń jáne taǵy basqa normativtik-quqyqtyq qujattardyń mazmundaryna ózgerister engizý boiynsha usynystar ázirleý, jas ǵalymdardyń quqyqtaryn qorǵaý, qoǵamda ǵylymdy nasihattaý jáne talantty jastardy ǵylymǵa tartý siiaqty memlekettik mańyzy bar qoǵamdyq jumystarmen ainalysyp keledi. Sondai-aq, Qazaqstan jas ǵalym-pedagogtar qaýymdastyǵynyń jáne Dúniejúzi qazaq jas ǵalymdar platformasynyń múshesi retinde qoǵamdyq ǵylymi jumystar atqarady.
Qazirgi tańda, Laishanov Shahislam Bilim jáne ǵylym ministrligi qarjylandyratyn 2 ǵylymi jobanyń jetekshisi bolyp tabylady: 1) AP09260017 Otyrar aýdanyndaǵy topyraqtardyń tuzdylyǵynyń júgeriniń ósip-ónýine áserin zertteý jáne daqyldyń ónimdiligin boljaýdyń ǵaryshtyq ádisin ázirleý (2021-2023 jj.); 2) P09058590 Turaqty jer paidalaný maqsatynda JAZ málimetteri men GAJ paidalanyp, Jambyl oblysy Talas aýdany jerleriniń shóldený jáne degradatsiialaný protsesine monitoring jasaý(2021-2023 jj.). Sondai-aq, ýniversitetishilik jobalar boiynsha da zertteý jumystaryn oryndaýda.
Shahislam Laishanov osy ýaqytqa deiin 50-den astam ǵylymi eńbekteri jaryq kórgen, olardyń ishinde: QR Bilim jáne ǵylym sapasyn qamtamasyz etý komitetiniń tizimindegi jýrnaldarda - 11 maqala; «Scopus» jáne «Web of Science» málimetter bazalaryndaǵy impakt-faktorly jýrnalda - 5 maqala; 1 avtorlyq kýálik, 1 ǵylymi zertteý nátijelerin endirý aktisi, 2 oqý quralynyń jáne mektepge arnalǵan 1 geografiialyq atlastyń avtory.
Laishanov Shahislamnyń jastardy ǵylymǵa baýlý jumystarymen belsendi ainalysyp keledi. Onyń jetekshiligimen stýdenteri halyqaralyq jáne respýblikalyq ǵylymi zertteý jumystary konkýrstarynda jeńimpaz atanǵan. Sondai-aq bastamashyl jáne jańasha oilaityn jastardyń biri. Sońǵy jyldary respýblikalyq jáne halyqaralyq deńgeidegi ǵylymi is-sharalardy ótkizýde uiymdastyrýshylyq qyrynan da kózge kórindi.
