İs-shara oblystyń qalalary men aýdandary ákimderi, memlekettik jáne quqyq qorǵaý organdary basshylarynyń, depýtattar, bıznes ókilderi, kvazımemlekettik sektor basshylarynyń, saıası partıalar, etnomádenı birlestikteri men qoǵam ókilderiniń qatysýymen ótti.
Óz sózinde oblystyń sybaılas jemqorlyqqa qarsy qyzmet basshysy E.Jalmaǵambet ázirlenip jatqan «2022-2026 jyldarǵa arnalǵan QR Sybaılas jemqorlyqqa qarsy saıasat tujyrymdamasyna» toqtaldy.
Kezdesý barysynda qatysýshylar naqty reformalar men jobalardy qamtıtyn Tujyrymdama mindetteriniń 6 blogyn talqylady. Olardyń ishinde sybaılas jemqorlyqqa tózbeýshilikti qalyptastyrý, bızneske korporatıvtik ádep arqyly sybaılas jemqorlyqqa qarsy áreket etý, jaýapkershilikten bultartpaýdy qamtamasyz etý boıynsha sharalardy jetildirý, sybaılas jemqorlyqqa qarsy azamattyq qoǵamnyń rólin kúsheıtý, sybaılas jemqorlyqqa qarsy saıasat monıtorıńi, ýákiletti organnyń qyzmetin jetildirý sıaqty mindetti sheshim bar.
– Tujyrymdamaǵa azamattyq qoǵam, sonyń ishinde bıznes ókilderiniń usynystary engizilgenin atap ótý mańyzdy. Strategıalyq qujatqa sizderdiń usynystaryńyz engizildi, atap aıtqanda, memlekettik satyp alýdaǵy memlekettik kompanıalardyń úlesteriniń qysqarýy, bir kózden satyp alý úshin negizderdi qysqartý kózdelgen.
Jańa strategıalyq qujat sybaılas jemqorlyqtyń alǵysharttaryn túbegeıli jáne keshendi joıýǵa baǵyttalǵan. Sana men moraldyq qaǵıdalardy ózgertýge mańyzdy ról berildi. Bizdiń maqsatymyz – qoǵamda sybaılas jemqorlyqqa qarsy myqty ımýnıtetti qalyptastyrý. Sybaılas jemqorlyq barlyq adamdar úshin materıaldyq jaǵynan tıimsiz bolatyn jaǵdaılar jasaıdy, – dep atap ótti Sybaılas jemqorlyqqa qarsy qyzmet departamentiniń basshysy.
Budan basqa, tujyrymdamanyń negizgi bólimderin talqylaý barysynda bıznes-ortaǵa engiziletin sybaılas jemqorlyqqa qarsy standarttardy engizý, qyzmetkerlerdi sybaılas jemqorlyqqa qarsy oqytý, bıznes-áriptesterdiń tizilimin engizý, komplaens-ofıserlerdi daıarlaý, kontragentterdiń adaldyǵyn baǵalaý, bıznes-ónimderdi erikti tańbalaý, «taza tolqyn» belgisiniń qyzmetteri sıaqty sybaılas jemqorlyqqa qarsy jobalarǵa erekshe nazar aýdaryldy.
Baıandamalardy talqylaý aıasynda keńeske qatysýshylar bank, memlekettik satyp alý jáne basqa da salalardaǵy sybaılas jemqorlyq táýekelderin joıý boıynsha birqatar usynystar men usynymdardy atady.
Ótken is-shara sońynda SHQO ákimdiginiń basshylyǵy Sybaılas jemqorlyqqa qarsy qyzmettiń bastamalaryn qoldaı otyryp, jergilikti atqarýshy organdar men kvazımemlekettik sektor basshylaryna birqatar naqty tapsyrmalar berdi.
