Prezident Qasym-Jomart Toqaev jasandy intellektini qaýipsiz ári jaýapkershilikpen damytýǵa baǵyttalǵan «Vashington modelin» halyqaralyq deńgeide qoldanýǵa bolatyn úlgi retinde qarastyrýdy usyndy, dep habarlaidy dalanews.kz.
Memleket basshysy bul týraly búgin Astanada ótken Jasandy intellektini damytý jónindegi keńestiń otyrysynda aitty.
Toqaevtyń aitýynsha, jasandy intellektige bailanysty qaýip-qaterler ulttyq shekaramen shektelmeidi. Sondyqtan bul salada memleketter men biznes arasyndaǵy úilesimdi áreket qajet.
«Der kezinde kóterilgen osy mańyzdy bastamany quptaimyn. Jasandy intellektige qatysty qaýip-qaterler eshqandai shekaraǵa baǵynbaitynyn bári túsinedi. Sondyqtan memleketter men biznes qaýymdastyq tarapynan úilesimdi áreket qajet», – dedi Prezident.
Memleket basshysy Vashingtonda jasalǵan kelisimdi halyqaralyq deńgeide zerdelep, ony jasandy intellektini retteýdiń yqtimal modeli retinde qarastyrýǵa bolatynyn atap ótti.
«Vashingtonda qol qoiylǵan kelisimdi sarapshylar muqiiat zerdelegen soń múddeli memleketter jasandy intellekt salasyn jahandyq deńgeide retteitin úlgi retinde qarastyrýyna bolady. «Vashington modeli» BUU aiasyndaǵy halyqaralyq kelisimge negiz bolýǵa laiyq dep oilaimyn», – dedi Qasym-Jomart Toqaev.
Prezident Qazaqstannyń jasandy intellektini qaýipsiz ári jaýapkershilikpen damytý ustanymyn qoldaitynyn atap ótti. Sonymen qatar elimiz halyqaralyq dialog júrgizýge alań usynýǵa daiyn ekenin aitty.
«Qazaqstan jasandy intellektini qaýipsiz ári jaýapkershilikpen damytýdy qoldaidy. Osy oraida, atalǵan másele boiynsha syndarly halyqaralyq dialog júrgizýge alań usyna alamyz. Keńes is júzinde mańyzdy ekenin kórsetti. Sondyqtan Keńes múshelerinen qysqa merzim ishinde Qazaqstannyń osy salaǵa qatysty halyqaralyq bastamasyna naqty usynys berýdi suraimyn», – dedi Memleket basshysy.
Toqaev Qazaqstannyń ortaq ustanymy biyl jeltoqsanda Maiamide ótetin G20 sammitinde tanystyrylatynyn jetkizdi.
