Qazaqstan Syrtqy ister ministrligi Reseige jumysqa baryp, keiin Ýkrainadaǵy soǵysqa jiberilgenin aitqan qazaqstandyqtardy elge qaitarý máselesin qolǵa aldy, dep habarlaidy dalanews.kz.
Vedomstvo Resei tarapymen konsýltatsiialardy jalǵastyryp, azamattardyń týystarynan aqparat jinaý úshin arnaiy jedel jeli iske qosylǵanyn málimdedi.
SIM bul máselege qatysty aqparattyń buqaralyq aqparat quraldarynda taralýyna bailanysty túsinikteme berdi. Ministrlik Qazaqstan azamattarynyń sheteldegi quqyqtary men zańdy múddelerin qorǵaý vedomstvo jumysynyń sózsiz basymdyǵy ekenin atap ótti.
Vedomstvonyń málimetinshe, Qazaqstan buǵan deiin de soǵys qimyldary júrip jatqan aimaqtardan azamattardy elge qaitarý boiynsha tájiribe jinaqtaǵan. Qazir ministrlik Resei tarapymen birlesken sharalardy pysyqtap jatyr.
Búgin Qazaqstannyń Syrtqy ister ministri Reseidiń Qazaqstandaǵy ýaqytsha senimdi ókilimen kezdesti. Al jaqyn arada Qazaqstannyń Reseidegi elshisi Resei Syrtqy ister ministrligi men Qorǵanys ministrliginiń basshylyǵymen kezdesýler ótkizedi.
SIM soǵys qimyldary júrip jatqan aimaqta bolýy múmkin qazaqstandyqtar týraly naqty aqparatty BAQ pen áleýmettik jelilerden emes, azamattardyń ózderinen nemese olardyń týystarynan tikelei alýdyń mańyzdy ekenin aitty. Ministrlikke olardyń aty-jóni, týǵan kúni, boljamdy ornalasqan jeri jáne Reseide jasasqan eńbek shartynyń talaptary qajet.
Osy maqsatta vedomstvoda azamattardyń týystarynan ótinish qabyldaityn arnaiy jedel jeli jumys istep tur.
Buǵan deiin Dala News Reseige jumys isteýge barǵan qazaqstandyqtardyń keiin Ýkrainadaǵy soǵysqa jiberilgeni týraly jazǵan edi. Olardyń aitýynsha, azamattarǵa bastapqyda kúzet salasyndaǵy jumys usynylǵan. Alaida Reseige barǵannan keiin jaǵdai ózgerip, áskeri sipattaǵy kelisimderge qol qoiý jáne soǵys aimaǵyna barý týraly talap qoiylǵan. Keibir qazaqstandyqtar bas tartqan jaǵdaida qysym men qylmystyq jaýapkershilikke tartylýy múmkin ekenin aityp, Qazaqstan biliginen kómek suraǵan.
Qazir SIM osy azamattardy anyqtap, olardyń quqyqtaryn qorǵaý jáne Qazaqstanǵa qaitarý boiynsha Resei tarapymen jumys júrgizip jatyr.
Ministrlik júrgizilip jatqan jumystyń barysy men nátijeleri týraly qosymsha aqparat beretinin málimdedi.
