Sońǵy jeti jyldyń ishinde Qazaqstanda 1 259 densaýlyq saqtaý nysany salyndy, onyń 800-den astamy sońǵy úsh jylda paidalanýǵa berildi. Negizgi basymdyq meditsinalyq-sanitariialyq alǵashqy kómekti damytýǵa berildi: jańa nysandardyń shamamen 95%-yn dárigerlik ambýlatoriialar men meditsinalyq pýnktter quraidy, dep habarlaidy dalanews.kz.
200-den astam aýyl alǵash ret óz meditsinalyq uiymdaryna ie boldy, al shamamen bir million aýyl turǵyny meditsinalyq kómekti úiine jaqyn jerden alý múmkindigine ie boldy.
Meditsinalyq infraqurylymdy damytý Memleket basshysynyń tapsyrmalary sheńberinde júzege asyrylýda jáne meditsinalyq kómektiń, ásirese aýyldyq jerlerdegi qoljetimdiligin arttyrýǵa baǵyttalǵan.
Jeti jyldyń ishinde elimizde 32 aýrýhana, 19 emhana, 1 196 dárigerlik ambýlatoriia, feldsherlik-akýsherlik jáne meditsinalyq pýnkt, úsh ǵylymi meditsinalyq ortalyq, sondai-aq qan ortalyqtary men ońaltý ortalyqtaryn qosa alǵanda, taǵy toǵyz meditsinalyq uiym salyndy.
«Aýyldyq densaýlyq saqtaýdy jańǵyrtý» ulttyq jobasynyń sheńberinde meditsinalyq-sanitariialyq alǵashqy kómek kórsetetin 655 nysan salyndy. Sonymen qatar 32 aýdandyq aýrýhana jańǵyrtylýda. Bul jergilikti jerlerde diagnostika men emdeý múmkindikterin keńeitýge múmkindik beredi.
Aýyldyq meditsinany damytýmen qatar respýblikalyq mańyzy bar iri jobalar da iske asyryldy. 2025 jyly Astanada Ulttyq ǵylymi onkologiia ortalyǵy jáne Almatyda 350 tósekke arnalǵan Ulttyq infektsiialyq aýrýlar ǵylymi ortalyǵy salyndy.
Óńirlerde de jańa meditsinalyq nysandar paida boldy. Mańǵystaý oblysynyń Munaily aýylyndaǵy aýdandyq aýrýhananyń, Ridder qalasyndaǵy kópbeiindi aýrýhananyń, Aqtaý qalasyndaǵy jedel meditsinalyq járdem stantsiiasynyń, sondai-aq Almaty oblysynyń Uzynaǵash jáne Narynqol aýyldarynda aýysymyna 250 adam qabyldaýǵa arnalǵan eki emhananyń qurylysy aiaqtaldy.
Jańǵyrtýdyń negizgi mindeti – sapaly meditsinalyq kómekti halyqqa barynsha jaqyndatý. Bul óńir turǵyndaryna qajetti meditsinalyq qyzmetterdi oblys ortalyqtaryna uzaq jol júrý qajettiliginsiz alýǵa múmkindik beredi.
Salanyń odan ári damýy 2024–2030 jyldarǵa arnalǵan densaýlyq saqtaý infraqurylymyn damytý tujyrymdamasynda kózdelgen. Qujatta zamanaýi kópbeiindi aýrýhanalar salý, eskirgen meditsinalyq ǵimarattardy jańartý, beiimdelgen úi-jailardyń sanyn qysqartý jáne meditsinalyq uiymdardy jobalaýdyń halyqaralyq standarttaryn engizý kózdelgen.
Infraqurylymdy damytý tek jańa nysandar salýmen shektelmeidi. Ol diagnostika men emdeýge arnalǵan zamanaýi jaǵdailar jasaýǵa, meditsinalyq kómektiń qoljetimdiligin arttyrýǵa jáne qalalyq jáne aýyldyq densaýlyq saqtaý arasyndaǵy aiyrmashylyqtardy qysqartýǵa baǵyttalǵan.
