Qazaqstanda memlekettik qyzmetterdi usynýdyń jańa modeli qalyptasyp jatyr. eGov 3.0 tujyrymdamasy azamattyń qajetti qyzmetti ózi izdeýinen góri, júieniń onyń suranysyn aldyn ala anyqtap, qajetti protsesterdi barynsha az áreketpen oryndaýyna negizdeledi. Bul týraly AI & Digital Bridge 2026 forýmyndaǵy eGov 3.0 paneldik sessiiasynda aityldy, dep habarlaidy dalanews.kz.
Qazir memlekettik qyzmetterdiń basym bóligi onlain kórsetiledi. Sondyqtan tsifrlandyrýdyń kelesi kezeńi jańa qyzmetterdi jai ǵana internetke kóshirý emes, olardy azamat pen biznes úshin barynsha yńǵaily etýge baǵyttalmaq.
Qazaqstan Respýblikasy Jasandy intellekt jáne tsifrlyq damý ministrliginiń birinshi vitse-ministri Rostislav Koniashkinniń aitýynsha, eGov 3.0 portaldyń dizainyn jańartýmen shektelmeidi. Negizgi ózgeris memlekettik qyzmetterdi ázirleý men usyný tásiline qatysty bolady.
«Jańa eGov 3.0, shyn máninde, portal dizainyn jańartýmen shektelmei, QazTech jańa tehnologiialyq platformasy negizinde júieni tolyq qaita qurýdy kózdeidi. Jańa arhitektýra júieniń ónimdiligi men turaqtylyǵyn arttyryp, jańa qyzmetterdi jyldam engizýge múmkindik beredi. QazTech – infraqurylymdy, qaýipsizdikti, ázirleý quraldaryn jáne daiyn komponentterdi biriktiretin tsifrlyq memlekettiń tehnologiialyq negizi. Osynyń arqasynda memlekettik servisterdi biryńǵai standarttar negizinde jyldamyraq ázirleýge bolady», – dedi Rostislav Koniashkin.
Bul modelde jasandy intellektiniń róli de artady. Máselen, azamatqa qajetti qyzmetti elektrondy úkimet portalynan nemese qosymshadan jeke izdeýdiń ornyna, óziniń máselesin qarapaiym tilmen sipattaý jetkilikti bolýy múmkin. Júie onyń suranysyn taldap, qandai qyzmet qajet ekenin anyqtap, odan árigi áreketterdi oryndaýǵa kómektesedi.
Bul baǵyt qazirdiń ózinde eGov Mobile qosymshasyndaǵy eGov GPT servisi arqyly iske asyrylyp jatyr. Qazirgi tańda platformada 55 memlekettik qyzmet qoljetimdi, ony 455 myńnan astam adam paidalanyp úlgergen.
Iaǵni eGov 3.0-diń negizgi aiyrmashylyǵy – azamat memlekettik júiege beiimdelmeidi, kerisinshe memlekettik servis paidalanýshynyń qajettiligine beiimdeledi. Qyzmetter ózara bailanysyp, azamattyń bir aqparatty birneshe ret engizýi nemese ártúrli júiege qaita-qaita júginýi azaiýy tiis.
Jańa tásil bizneske kórsetiletin memlekettik qyzmetterge de engizilmek. Bul baǵytta eGov Business platformasy damytylyp jatyr. Qosymshany ai saiyn shamamen 44 myń kásipker paidalanady. Munda shaǵyn jáne orta bizneske arnalǵan 40-tan astam memlekettik qyzmet pen litsenziia, kompaniia týraly aqparat jáne qujattar qoljetimdi.
Aldaǵy ýaqytta kásipkerlerge de jasandy intellekt kómegimen qajetti qyzmetti tabý jáne ótinim daiyndaý múmkindigi usynylmaq. eGov GPT mýltiagenttik platformasy kásipkerdiń suranysyn erkin túrde sipattaýyna múmkindik beredi. Júie soǵan sáikes qajetti qyzmetti anyqtap, kelesi qadamdardy usynady.
«Ulttyq aqparattyq tehnologiialar» AQ Basqarma tóraǵasynyń mindetin atqarýshy Shyńǵys Orazalimovtiń aitýynsha, kásipkerler úshin de negizgi maqsat – kóptegen protsesti bir tsifrlyq ortaǵa biriktirý.
«Kásipker negizgi máselelerin bir qosymsha arqyly sheshe alatyn júiege kóshý baǵytynda jumys istep jatyrmyz. Atap aitqanda, kompaniia qujattaryn tsifrlyq formatta rásimdeý múmkindigin engizýdi josparlap otyrmyz. JShS jarǵysyn onlain rejimde ázirleýge, oǵan qol qoiýǵa jáne keiin ózgerister engizýge bolady, bul rette qujattyń barlyq nusqalary saqtalatyn bolady», – dedi Shyńǵys Orazalimov.
Sessiiada Qazaqstannyń tájiribesimen qatar, memlekettik basqarýdy tsifrlandyrýdyń halyqaralyq tásilderi de talqylandy. Grýziianyń Tsifrlyq basqarý agenttiginiń tóraǵasy Sandro Tsirekidze Qazaqstannyń eGov 3.0 baǵytyndaǵy tájiribesine qyzyǵýshylyq bildirip, jasandy intellektini memlekettik qyzmettermen ózara is-qimyldy jeńildetý úshin paidalaný tásilin atap ótti.
Osylaisha, eGov 3.0-diń basty maqsaty – memlekettik qyzmetterdiń sanyn kóbeitýmen qatar, azamattyń olardy alý úshin jasaityn áreketin azaitý. Jasandy intellekt, derekter jáne ózara bailanysqan tsifrlyq júieler osy ózgeristiń negizgi tehnologiialyq quraldary bolmaq.
AI & Digital Bridge 2026 forýmynda ótken sessiiaǵa Qazaqstannyń Jasandy intellekt jáne tsifrlyq damý ministrligi, «Ulttyq aqparattyq tehnologiialar» AQ ókilderimen qatar, Grýziia men halyqaralyq tsifrlyq transformatsiia sarapshylary qatysty. Forým 1–3 qazan aralyǵynda Astanadaǵy EXPO halyqaralyq kórme ortalyǵynda ótip jatyr.
