Abai oblysynyń Sarjal aýyly respýblika kóleminde alǵash ret uiymdastyrylǵan «BaiQymyz» gastrofestivalinde bas júldege ie boldy. Bul týraly oblys ákimi Berik Ýáli óziniń áleýmettik jelidegi paraqshasynda jazdy,- dep habarlaidy Dalanews.kz
– Bul – óńirimiz úshin úlken mártebe ári ádiletti jeńis. Sarjaldyń sary qymyzy – kópten beri el aýzynda júrgen, talai jurttyń tańdaiyn qaqtyrǵan tabiǵi ónim. Búgingi jeńis tek dám arqyly emes, ádil de ashyq daýys berý nátijesinde anyqtaldy. Demek, bul – halyqtyń ózi bergen ádil baǵa, – dep jazdy óńir basshysy.
Atalǵan festival – ulttyq taǵam men dástúrli ónimderdi dáripteýge baǵyttalǵan aýqymdy mádeni shara. Onda elimizdiń ár aimaǵynan kelgen qymyz óndirýshiler óz ónimderin usyndy. Sarapshylar men kórermenderdiń daýys berýi arqyly Sarjal aýylynyń qymyzy úzdik dep tanyldy.
Oblys ákiminiń aitýynsha, bul jetistik – óńirdiń rýhani jáne mádeni áleýetiniń kórinisi. Ásirese, Abaidyń 180 jyldyǵy qarsańynda mundai jańalyqtyń simvoldyq máni zor.
– Bul tek bir baiqaýdyń júldesi emes, óńirimizdiń dástúrge degen qurmetin, tabiǵi ónimge adaldyǵyn kórsetken aishyqty oqiǵa. Aldaǵy ýaqytta osy jetistik ishki týrizmdi damytýǵa, óńirlik brend retinde ulttyq taǵamdarymyzdy ilgeriletýge jańa serpin beredi dep senemin, – dedi Berik Ýáli.
Óńir basshysy jeńiske úles qosqan qymyz óndirýshilerge, uiymdastyrýshylarǵa jáne daýys bergen kópshilikke alǵys bildirdi.
