Qazaqstan 2030 jylǵa deiin tikelei sheteldik investitsiia kólemin turaqty arttyrýdy kózdeidi, dep habarlaidy Dala News.
2025 jyldyń sońynda Investitsiialyq saiasat tujyrymdamasy bekitilip, elge kapital tartý tetikteri túbegeili jańartyldy. Qujattyń basty maqsaty – investorlarǵa qolaily ári boljamdy orta qalyptastyrý, olardyń quqyqtaryn naqty qorǵaý.
Sarapshy Aigerim Iliiasovanyń aitýynsha, tujyrymdama qaǵaz júzindegi deklaratsiiamen shektelmeidi. Endi investitsiialyq jobalardyń taǵdyry naqty tulǵalarǵa, sonyń ishinde óńir ákimderine tikelei bailanysty bolady. Bul vedomstvolar arasyndaǵy jobalardyń «ilinip qalýy», jaýapkershiliktiń bulyńǵyr bolýy jáne merzimderdiń sozylýy sekildi júieli máselelerdi joiýǵa baǵyttalǵan.
– Investor úshin eń mańyzdysy – turaqtylyq. Jańa saiasat salyq jáne retteý erejelerin uzaq merzimge boljamdy etedi. Bul kapitaldy 1–2 jylǵa emes, 10–20 jylǵa salýǵa múmkindik beredi, – deidi ol.
Qazirdiń ózinde Qazaqstan jyl saiyn 20 milliard dollardan astam tikelei investitsiia tartyp otyr. Bul – Ortalyq Aziiadaǵy barlyq investitsiianyń shamamen 60 paiyzy. Negizgi investorlar qatarynda Eýroodaq elderi, AQSh, Resei jáne Qytai bar. Sonymen qatar Taiaý Shyǵys elderiniń belsendiligi kúrt artty.
Máselen, 2025 jyldyń toǵyz aiynda Katardan kelgen investitsiia kólemi 1,2 milliard dollarǵa jetken. Al 2023 jyly bul kórsetkish nebári 9 million dollar bolǵan. Mundai serpiliske gaz óńdeý zaýyttary, energetika nysandary men Beineý–Bozoi–Shymkent gaz qubyrynyń ekinshi jelisi siiaqty iri jobalar sebep boldy.
Memleket aldynda turǵan basty mindet investorlarǵa tartymdy orta qalyptastyra otyryp, ulttyq múddeni saqtap qalý. Sarapshylardyń pikirinshe, jańa tujyrymdama osy tepe-teńdikti tabýǵa baǵyttalǵan alǵashqy naqty qadam bolmaq.
