Mańǵystaý oblysy politsiia departamentiniń uiymdasqan qylmysqa qarsy kúres basqarmasynyń qyzmetkerleri jedel-izdestirý is-sharalaryn júrgizý barysynda bopsalaý deregin anyqtady, – dep habarlaidy Dalanews.kz.
Bul derek boiynsha 26 jastaǵy jábirlenýshi aryzben júgingen. Onyń aitýynsha, 26 jastaǵy er adam jábirlenýshiniń intimdik sipattaǵy fotosýretterin áleýmettik jelilerde jáne týystaryna jariialaimyn dep qorqytyp, bir million teńge kóleminde aqsha bopsalaǵan.
Tergeý materialdaryna sáikes, kúdikti 17 qańtarda WhatsApp messendjeri arqyly jábirlenýshiden aldymen 200 myń teńge aýdarýdy, al qalǵan 800 myń teńgeni 20 qańtarǵa deiin berýdi talap etken. Aqshany shot arqyly aýdartpaq bolǵan. Jedel-izdestirý sharalary nátijesinde 17 qańtarda Jańaózen qalasynda eki er adam ustaldy. Tintý barysynda kúdiktiden kók tústi iPhone 14 Pro Max, al ekinshi kúdiktiden qara tústi iPhone 11 telefondary zattai dáleldeme retinde tárkilendi.
Bul fakti boiynsha QR Qylmystyq kodeksiniń 194-babynyń 1-bóligi boiynsha qylmystyq is qozǵalyp, málimetter sotqa deiingi tergep-tekserýdiń biryńǵai tizilimine tirkeldi. Kúdiktiler ýaqytsha ustaý izoliatoryna qamaldy. Qazirgi ýaqytta sotqa deiingi tergep-tekserý amaldary jalǵasyp jatyr.
