قازىرگى تاڭدا تۇركىستاندا مادەنيەت پەن ونەرگە ايرىقشا كوڭىل ءبولىنىپ كەلەدى. رۋحانياتتى دامىتۋعا ارنالعان تىڭ جوبالار ىسكە اسۋدا. رەسپۋبليكالىق، حالىقارالىق دەڭگەيدەگى سيمپوزيۋمدار، ونەر فەستيۆالدارى ءوتىپ كەلەدى. سونىڭ ءبىرى رەسپۋبليكا كۇنىنە وراي ۇيىمداستىرىلعان حالىقارالىق «Voice of Turan-2024» قازاق اندەرىن ورىنداۋشىلار بايقاۋى. كەشە وبلىس اكىمىنىڭ ءبىرىنشى ورىنباسارى زۇلپىحار جولداسوۆ فەستيۆال قوناقتارىمەن كەزدەسىپ، يندونەزيانىڭ قازاقستانداعى توتەنشە جانە وكىلەتتى ەلشىسى موحاماد فادجرۋل راحماندى ارنايى قابىلدادى. ەكى ەل اراسىنداعى تۋريستىك بايلانىستاردى نىعايتۋعا ۋاعدالاستى، دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
– تۇركى الەمىنىڭ رۋحاني ورتالىعىنا اينالعان قاسيەتتى تۇركىستان قالاسىنا قوش كەلدىڭىزدەر! ونەر – ۇلتتىڭ جانى، رۋحى، بار ءبىتىم-بولمىسىن ايشىقتاپ تۇراتىن ەرەكشە قۇبىلىس. بۇگىن الەمنىڭ ءار قيىرىنان كەلگەن تالانتتى جاستاردى قاسيەتتى قالامىزدا كورگەنىمىزگە قۋانىشتىمىز. سونىمەن قاتار ءوزىڭىز باستاعان يندونەزيا ەلشىلىگىنە قولداۋلارىڭىز ءۇشىن العىسىمدى بىلدىرەمىن. بايقاۋ الدىندا وزدەرىڭىزبەن ارنايى جولىعىپ، ىزەتىمدى ءبىلدىرۋدى ءجون سانادىم. وزدەرىڭىزبەن كەزدەسۋ بارىسىندا دا ەكى ەل اراسىنداعى مادەني-رۋحاني بايلانىستاردى دامىتۋ باعىتىنداعى ۇسىنىستارىڭىزدى تىڭداپ، بىرلەسە جۇمىس اتقارۋعا دايىن ەكەنىمىزدى جەتكىزگىم كەلەدى. تۇركىستان قالاسىنا ساپارلارىڭىزدىڭ بۇگىنگى رۋحاني شارامەن بايلانىستى بولعانىنا شىن قۋانىشتىمىن. الداعى ۋاقىتتا دا ەلدەر اراسىنداعى بايلانىستاردى بەرىك نىعايتىپ، رۋحاني-مادەني باعىتتا بىرلەسە اتقارار جوبالارىمىز مول بولادى دەپ سەنەمىن، – دەگەن زۇلپىحار سانسىزباي ۇلى ءوڭىردىڭ مادەني-تۋريستىك الەۋەتىن تانىستىردى.
تۇران داۋىسىن تاماشالاۋعا كەلگەن يندونەزيانىڭ قازاقستانداعى توتەنشە جانە وكىلەتتى ەلشىسى موحاماد فادجرۋل راحمان ءوز كەزەگىندە جاڭارعان تۇركىستان قالاسى تۋرالى اسەرىن جەتكىزدى. يندونەزيا ەلى جايلى جان-جاقتى ماعلۇمات بەردى. اتالعان مەملەكەتتەن قاتىسىپ جاتقان يندونەزيالىق ءانشى تاررارينگە ساتتىلىك تىلەدى. ەكى ەل اراسىنداعى بايلانىستىڭ نىشانى رەتىندە ەستەلىككە سىي-سياپات تابىستالدى.
تۇركىستاننىڭ تەرەڭ تاريحىنا جانە جاڭا كەلبەتىنە قىزىعۋشىلىق تانىتىپ كەلەتىن تۋريستەر سانى كۇن ساناپ ارتىپ وتىر. ولارعا لايىقتى قىزمەت ساپاسىن ارتتىرۋ، تاريحي ورىندارمەن قاتار، جاڭادان بوي كوتەرگەن مادەني نىسانداردى رۋحاني باعىتتاعى شارالارعا دەگەن قولجەتىمدىلىكتەرىن ارتتىرۋ ماقساتىندا وڭىردە جۇيەلى جۇمىستار قولعا الىنعان.
- ايتا كەتەيىك، قازاق اندەرىن الەمدىك دەڭگەيدە ناسيحاتتاۋدى ماقسات ەتكەن بايقاۋدىڭ جىل سايىن اۋقىمى ۇلعايىپ كەلەدى. 2 رەت ونلاين رەجيمدە ۇيىمداستىرىلعان فەستيۆال 5 جىلدان بەرى حالىقتىق مەرەكەگە اينالىپ ۇلگەردى. بيىلعى بايقاۋعا 16 ەلدەن كەلگەن قاتىسۋشىلار «كونگرەسس حولل» كەشەنىندە ەكى كۇن بويى ءوز باقتارىن سىناماق.
