قازاقستان پرەمەر-مينيسترى ولجاس بەكتەنوۆ ەلوردادا جەڭىل رەلستى كولىك (LRT) جەلىسىن سالۋ جونىندەگى جوبانىڭ بارىسىن تەكسەردى،- دەپ حابارلايدى Dalanews.kz.
استانا قالاسىنىڭ اكىمى جەڭىس قاسىمبەك نىساننىڭ دايىندىق دەڭگەيى جانە مەگاپوليستىڭ كولىك جۇيەسىن ودان ءارى دامىتۋ كەلەشەگى تۋرالى باياندادى.
بۇگىنگى تاڭدا LRT ەستاكاداسىنىڭ ارقالىقتارىن توسەۋ كەزەڭى اياقتالدى. Cتانسالاردىڭ نەگىزگى تەمىربەتون كونسترۋكسيالارى قۇرىلىسىن 2024 جىلدىڭ سوڭىنا دەيىن اياقتاۋ جوسپارلانىپ وتىر. كەلەسى جىلى رەلستەردى توسەۋ، ستانسالاردى ارلەۋ جانە جىلجىمالى قۇرامداردى جەتكىزەتىن دەپو قۇرىلىسىن جۇرگىزۋ، قابانباي باتىر داڭعىلى مەن قالداياقوۆ كوشەسى بويىنداعى ەستاكادالىق بولىكتى اباتتاندىرۋ جۇرگىزىلەدى.
جەڭىل رەلستى جەلىنىڭ جالپى ۇزىندىعى 22،4 كم قۇرايدى. LRT قۇرامىنا 18 ستانسا كىرەدى. 652 ادام سىياتىن 19 جىلجىمالى قۇرامدى ىسكە قوسۋ جوسپارلانۋدا. قوزعالىس ارالىعى 4-5 مينۋتتى قۇرايدى. باستاپقى كەزەڭدە تاۋلىگىنە 25 مىڭ ادام جولاۋشىلار اعىنى كۇتىلەدى، بۇل رەتتە جولاۋشىلار اعىنى ەڭ جوعارى ۋاقىتتا تاۋلىگىنە 92 مىڭ ادامعا جەتۋى مۇمكىن. تولەم جۇيەسى قالالىق انالوگى بويىنشا، كولىك كارتاسىن ۆاليداسيالاۋ نەمەسە QR-كود ارقىلى تولەۋ ارقىلى قاراستىرىلعان.
ستانسا اۋماعىندا پرەمەر-مينيستر قۇرىلىس بارىسىندا قولدانىلاتىن تەحنولوگيالىق شەشىمدەرمەن تانىستى.
جوبانى ىسكە اسىرۋعا China Construction Sixth Bureau، Yunnan Construction and Investment Holding Group Co.، Longjian Road and Bridge Co.، Tianjin Rail Transit Group Co.، CRRC Tangshan Co LTD. سياقتى جوعارى ستاندارتتاردى ساقتاۋىمەن تانىمال قىتايلىق جەتەكشى كومپانيالار تارتىلعان. سونداي-اق CRSCInternational، CASCO، HUAWEI Smart Transport BU كومپانيالارى كولىك جۇيەسىنىڭ ءقاۋىپسىز ءارى ءتيىمدى جۇمىسىن قامتاماسىز ەتۋدە شەشۋشى ءرول اتقاراتىن بايلانىس، دابىل جانە اۆتوماتتاندىرۋ جۇيەلەرىن رەتتەۋگە قاتىسادى. China Railway Asia-EuropeConstruction Investment قوسالقى مەردىگەر كومپانياسىنىڭ باس ديرەكتورى چجوۋ حايۆەي يننوۆاسيالىق تەحنولوگيالار قولدانىلىپ جاتقانىن باياندادى. جوبا اياقتالعاننان كەيىن جەڭىل رەلستى جەلى بويىمەن جۇرگىزۋشىسىز پويىزدار ىسكە قوسىلادى.
«City Transportation Systems» ج ش س باسقارما ءتوراعاسى اسىلبەك دۇيسەبايەۆتىڭ ايتۋىنشا، بارلىق قۇرىلىس جۇمىسىن اياقتاۋ جانە LRT ىسكە قوسۋ 2025 جىلدىڭ سوڭىنا دەيىن جوسپارلانعان.
ولجاس بەكتەنوۆ جوبانىڭ ساپاسى مەن ىسكە اسىرىلۋ مەرزىمدەرىن باقىلاۋدى كۇشەيتۋ قاجەتتىگىن اتاپ ءوتتى.
«مەملەكەت باسشىسى ەلىمىزدىڭ كولىك جۇيەسىن دامىتۋعا كوپ كوڭىل بولەدى. LRT جوباسى بويىنشا ينفراقۇرىلىمدى دايىنداۋ بويىنشا ۇلكەن جۇمىس جۇرگىزىلدى، قاراجات ءبولىندى. LRT قالا تۇرعىندارىنا، ەلوردا قوناقتارىنا قىزمەت ەتەدى. قۇرىلىس جۇمىستارىنىڭ قارقىنى ارتىپ كەلەدى، ولاردى باسەڭدەتپەۋ ماڭىزدى. جوبا ەڭ جوعارى دەڭگەيدە جۇزەگە اسىرىلۋى كەرەك. اكىمدىك پەن ورتالىق مەملەكەتتىك ورگاندار تاراپىنان باقىلاۋ كۇشەيتىلۋى ءتيىس. ناتيجەگە جۇمىس ىستەيتىن بولامىز»، — دەدى پرەمەر-مينيستر.
